അതിശയിപ്പിച്ച് മുംബൈ ഇന്ത്യന്‍സ്
ടി20 ക്രിക്കറ്റ് എങ്ങിനെ കളിക്കണമെന്ന് ലോകത്തിന് കാണിച്ചുകൊടുക്കുകയാണ് മുംബൈ ഇന്ത്യന്‍സ്. ലോകത്തെ ഏറ്റവും മികച്ച കളിക്കാര്‍ ഏറ്റവും മികവുറ്റ പ്രകടനം പുറത്തെടുക്കുന്നു എന്നതാണ് മുംബൈ ഇന്ത്യന്‍സിന്റെ വിജയരഹസ്യം. പൂര്‍ണതയുള്ള കളിയെന്ന് മുംബൈ ക്യാപ്റ്റന് രോഹിത് ശര്‍മ ആവര്‍ത്തിച്ച് പറയുന്നതും മറ്റൊന്നുകൊണ്ടുമല്ല. കൊല്‍ക്കത്തയ്‌ക്കെതിരെ രോഹിത് ശര്‍മയ്‌ക്കൊപ്പം(35), ക്വിന്റണ്‍ ഡി കോക്കും(78) ആദ്യ വിക്കറ്റില്‍ ഉറച്ചുനിന്നതോടെ മുംബൈ വിജയം ഉറപ്പിച്ചിരുന്നു. നേരത്തെ ബൗളര്‍മാരുടെ അതിശയിപ്പിക്കുന്ന പ്രകടനമാണ് കൊല്‍ക്കത്തയെ തളച്ചിട്ടത്. ജെയിംസ് പാറ്റിസണിന് പകരമായെത്തിയ കോള്‍ട്ടര്‍ നില്‍ നിരാശപ്പെടുത്തിയെങ്കിലും മറ്റു ബൗളര്‍മാരെല്ലാം ജോലി ഭംഗിയായി നിര്‍വഹിച്ചു.
(PC: BCCI/IPL)
പാഠം പഠിക്കാതെ കൊല്‍ക്കത്ത
കെട്ടുറപ്പില്ലാത്ത ടീമും സ്ഥിരതയില്ലാത്ത കളിയും കൊല്‍ക്കത്തയുടെ വിധിയെഴുതി. ദിനേഷ് കാര്‍ത്തിക്കും നിതീഷ് റാണയും രാഹുല്‍ ത്രിപാഠിയുമെല്ലാം തുടക്കത്തില്‍തന്നെ വിക്കറ്റ് വലിച്ചെറിഞ്ഞതോടെ ടീം സ്വാഭാവിക തകര്‍ച്ചയിലേക്ക് നീങ്ങുകയായിരുന്നു. ആന്ദ്രെ റസ്സല്‍ ഒരിക്കല്‍ക്കൂടി നിരാശപ്പെടുത്തി. പാറ്റ് കമ്മിന്‍സും മോര്‍ഗനും ചേര്‍ന്ന കൂട്ടുകെട്ടാണ് നാണക്കേടിയില്‍ നിന്നും കൊല്‍ക്കത്തയെ രക്ഷിച്ചത്.
(PC: BCCI/IPL)
വിജയരഹസ്യത്തെക്കുറിച്ച് രോഹിത്
ബാറ്റിങ്ങിലും ബൗളിങ്ങിലും പിഴവുകളില്ലാത്ത പ്രകടനമാണ് വിജയരഹസ്യമെന്ന് രോഹിത് ശര്‍മ പറയുന്നു. തുടര്‍ച്ചയായി അഞ്ചു വിജയം നേടുകയെന്നത് ചെറിയ കാര്യമല്ല. ആദ്യ മത്സരം തോറ്റു തുടങ്ങിയശേഷമായിരുന്നും മുംബൈയുടെ തിരിച്ചുവരവ്. കിരീടം നേടാനുള്ള എല്ലാ സാധ്യതയും മുംബൈയ്ക്കുണ്ട്. ബൗളര്‍മാര്‍ക്കെതിരെ ആധിപത്യം നേടുന്ന ഡി കോക്കിനെ പോലെ ഒരു ഓപ്പണര്‍ ഫോമിലായിക്കഴിഞ്ഞാല്‍ മറ്റു കളിക്കാര്‍ക്ക് കാര്യങ്ങള്‍ എളുപ്പമാകുന്നു.
(PC: BCCI/IPL)
Also Read:ക്യാപ്റ്റന് സ്റ്റീവ് സ്മിത്തിനെ മാറ്റുന്നു, പകരം മറ്റൊരു വിദേശതാരം? റോയല്‍സ് പ്രതികരണം ഇങ്ങനെ!!
ക്യാപ്റ്റന് മോര്‍ഗന് മോശം തുടക്കം
കൊല്‍ക്കത്തയുടെ ക്യാപ്റ്റന് സ്ഥാനം ഏറ്റെടുത്ത ഇയോയിന്‍ മോര്‍ഗന് ആദ്യ മത്സരം തന്നെ ദുരന്തമായി. മുന്‍ ക്യാപ്റ്റന് ദിനേഷ് കാര്‍ത്തിക് ഉള്‍പ്പെടെയുള്ളവരുടെ പ്രകടനം വരും മത്സരങ്ങളിലും ടീമിന് തലവേദനയായേക്കും. പ്ലേ ഓഫ് ഉറപ്പിക്കാന്‍ മറ്റു ടീമുകള്‍ കിണഞ്ഞു ശ്രമിക്കുമ്പോള്‍ കൊല്‍ക്കത്ത എത്രമാത്രം മുന്നേറുമെന്നതാണ് ആരാധകര്‍ ഉറ്റുനോക്കുന്നത്. വരാനിരിക്കുന്ന മത്സരങ്ങള്‍ ക്യാപ്റ്റനെന്ന നിലയില്‍ മോര്‍ഗന് വലിയ വെല്ലുവിളിയായി മാറുമെന്നുറപ്പാണ്.
(PC: BCCI/IPL)