റോയല്സിന്റെ ബാറ്റിങ് ലൈനപ്പ്
ജോസ് ബട്ലറും ബെന് സ്റ്റോക്സും ആയിരിക്കും രാജസ്ഥാന് റോയല്സിന്റെ ഓപ്പണിങ് ബാറ്റ്സ്മാന്മാരെന്നാണ് സൂചന. ഇരുവരും കഴിഞ്ഞ സീസണില് ഈ റോളിലെത്തി കഴിവ് തെളിയിച്ചവരാണ്. ബെന് സ്റ്റോക്സ് ഓപ്പണറായില്ലെങ്കില് മധ്യ നിരയിലേക്ക് മാറും. അങ്ങിനെയെങ്കില് യശസ്വി ജയ്സ്വാള് ആയിരിക്കും ബട്ലര്ക്കൊപ്പം ഇന്നിങ്സ് ഓപ്പണ് ചെയ്യുക. വണ് ഡൗണ് ആയി ക്യാപ്റ്റന് സഞ്ജു സാംസണ് ഇറങ്ങും. റിയാന് പരാഗ്, ശിവം ദുബെ, രാഹുല് തെവാതിയ എന്നിവരായിരിക്കും മധ്യനിരയിലെ മറ്റു ബാറ്റ്സ്മാന്മാര്.
റോയല്സിന്റെ ബൗളിങ് നിര
ബൗളിങ്ങിലെ കൈവിട്ട കളിയാണ് എക്കാലവും റോയല്സിന് വിനയാകാറുള്ളത്. ഇക്കുറിയും ടീമിന്റെ പ്രധാന ദൗര്ബല്യം ബൗളിങ് ആയിരിക്കും. ഓള്റൗണ്ടര്മാരുടെ എണ്ണം കൂട്ടിയത് ഇതിന്റെ ഭാഗമായിട്ടാകണം. 16 കോടിയോളം രൂപയ്ക്കെത്തിയ ക്രിസ് മോറിസ് ആയിരിക്കും ഇത്തവണ റോയല്സിന്റെ ബൗളിങ് നിരയെ നയിക്കുക. ബംഗ്ലാദേശ് താരം മുസ്താഫിസുര് റഹ്മാനും ഒപ്പമുണ്ടാകും. സ്പെഷലിസ്റ്റ് സ്പിന്നറായി ഇറങ്ങുക ശ്രേയസ് ഗോപാലാണ്. കൂടാതെ ശിവം ദുബെ, ബെന് സ്റ്റോക്സ്, രാഹുല് തെവാതിയ എന്നീ ഓള്റൗണ്ടര്മാരും പന്തേറില് സഹായിക്കും. കാര്ത്തിക് ത്യാഗിയോ ജയദേവ് ഉനദ്കട്ടോ ആയിരിക്കും സംഘത്തിലെ ഇന്ത്യന് പേസര്.
ബാറ്റിങ് കരുത്തുമായി പഞ്ചാബ്
കരുത്തേറിയ ഒരു ബാറ്റിങ് നിര ഈ സീസണിലും പഞ്ചാബിനുണ്ട്. കെ എല് രാഹുലും മായങ്ക് അഗര്വാളും ഓപ്പണര്മാരാകും. ക്രിസ് ഗെയ്ല്, നിക്കൊളാസ് പൂരന്, സര്ഫ്രാസ് ഖാന്, മന്ദീപ് സിങ് എന്നിവര് മധ്യനിരയിലും കളിക്കും. കഴിഞ്ഞ സീസണില് ഗെയിലിനെ പാതിവഴിയില് മാത്രം ടീമിലെത്തിച്ചത് പഞ്ചാബിന് തിരിച്ചടിയായിരുന്നു. തുടക്കത്തിലെ തുടര്തോല്വികളാണ് പഞ്ചാബിന് പ്ലേ ഓഫ് നിഷേധിച്ചത്. അതുകൊണ്ടുതന്നെ ഇത്തവണ ഗെയിലിനെ തുടക്കംമുതല് കളിപ്പിക്കാനാണ് നീക്കം.
കോടികളുടെ കിലുക്കവുമായി ബൗളര്മാര്
കോടികളെറിഞ്ഞ് നേടിയ ജെ റിച്ചാര്ഡ്സണ് ആയിരിക്കും പഞ്ചാബിന്റെ പ്രധാന ബൗളര്. ഒപ്പം ക്രിസ് ജോര്ദന്, രവി ബിഷ്ണോയ്, ആര്ഷ് ദീപ് സിങ്, മുഹമ്മദ് ഷമി എന്നിവരുമുണ്ടാകും. ജോര്ദന് കളിച്ചില്ലെങ്കില് റിലെ മെറിഡിത്തിന് അവസരം തെളിയും. കഴിഞ്ഞ സീസണില് കാര്യമായി തിരിച്ചടി നേരിട്ട ബൗളിങ് നിര ആയിരിക്കില്ല ഇത്തവണ. ലേലത്തില് പണമെറിഞ്ഞുകൊണ്ടുവന്ന പേസ് സംഘത്തിലാണ് പഞ്ചാബിന്റെ പ്രതീക്ഷയെല്ലാം.