ബൗളര്‍മാര്‍ വിജയമൊരുക്കി
മികച്ച തുടക്കം ലഭിച്ചിട്ടും മധ്യനിരയുടെ തകര്‍ച്ച ഹൈദരാബാദിന് പ്രതീക്ഷിച്ച സ്‌കോര്‍ നല്‍കിയില്ല. എന്നാല്‍, ബൗളര്‍മാര്‍ അവസരത്തിനൊത്ത് ഉയര്‍ന്നതോടെ കളി കൈയ്യിലൊതുക്കാനായി. ജേസണ്‍ റോയ് (44), കെയ്ന്‍ വില്യംസണ്‍ (31) എന്നിവരാണ് ബാറ്റിങ്ങില്‍ തിളങ്ങിയവര്‍. ബൗളിങ്ങില്‍ റാഷിദ് ഖാന് സീസണില്‍ ആദ്യമായി അടികിട്ടിയെങ്കിലും മറ്റു ബൗളര്‍മാരെല്ലാം മികവുകാട്ടി. അവസാന ഓവറിലെ 12 റണ്‍സ് പ്രതിരോധിച്ച ഭുവനേശ്വര്‍ കുമാറിന്റേയും 4 ഓവറില്‍ 21 റണ്‍സ് മാത്രം വഴങ്ങിയ ഉമ്രാന്‍ മാലിക്കിന്റേയും പ്രകടനം എടുത്തപറയേണ്ടതാണ്.
(PTI Photo/Sportzpics)
വഴിത്തിരിവായി റണ്ണൗട്ട്
ബാറ്റിങ്ങിലുണ്ടായ ചില പിഴവുകളാണ് ആര്‍സിബിക്ക് തോല്‍വി സമ്മാനിച്ചത്. ദേവദത്ത് പടിക്കലും (41), ഗ്ലെന്‍ മാക്‌സ്‌വെലും (40) പോരാട്ടവീര്യം കാട്ടിയെങ്കിലും കാര്യമുണ്ടായില്ല. മാക്‌സ് വെലിന്റെ റണ്ണൗട്ട് കളിയിലെ വഴിത്തിരിവായി. ഡാന്‍ ക്രിസ്റ്റിയനെ വണ്‍ഡൗണ്‍ ആയി വീണ്ടും പരീക്ഷിച്ചതും തിരിച്ചടി നല്‍കി. അതേസമയം, നേരത്തെ തന്നെ പ്ലേ ഓഫിലെത്തിയിരുന്നതിനാല്‍ തോല്‍വി ആര്‍സിബിയെ ബാധിക്കില്ല.
(PTI Photo/Sportzpics)
താളം കണ്ടെത്തി ഭുവനേശ്വര്‍
ഐപിഎല്‍ അവസാനഘട്ടം അടുക്കുമ്പോഴേക്കും ഭുവനേശ്വര്‍ കുമാര്‍ ഫോമിലേക്കുയര്‍ന്നത് ഇന്ത്യയ്ക്ക് ആശ്വാസമാണ്. ടി20 ലോകകപ്പ് ടീമില്‍ ഉള്‍പ്പെട്ട ഭുവിയുടെ പ്രകടനം തുടക്കത്തില്‍ നിരാശാജനകമായിരുന്നെങ്കിലും അവസാന രണ്ടു മത്സരങ്ങളില്‍ താരത്തിന് താളം കണ്ടെത്താന്‍ സാധിച്ചു. തുടര്‍ച്ചയായ രണ്ടാം മത്സരത്തിലും തിളങ്ങിയ ഉമ്രാന്‍ മാലിക്കും വരവറിയിച്ചിട്ടുണ്ട്. മെഗാ ലേലത്തില്‍ കോടികള്‍ ലഭിച്ചേക്കാവുന്ന താരമായി ഉമ്രാന്‍ മാറിക്കഴിഞ്ഞു.
(PTI Photo/Sportzpics)
ആര്‍സിബിക്ക് മുന്നറിയിപ്പ്
പ്ലേ ഓഫിന് മുന്നോടിയായുള്ള മുന്നറിയിപ്പാണ് ആര്‍സിബിക്ക് ഹൈദരാബാദിനെതിരായ മത്സരം. അമിത ആത്മവിശ്വാസം ടീമിന് തിരിച്ചടി നല്‍കി. മധ്യനിരയില്‍ ചില കളിക്കാരുടെ മോശം ഫോമും ആശങ്കയ്ക്കിടയാക്കുന്നതാണ്. എബി ഡി വില്ലിയേഴ്‌സിനെ വണ്‍ഡൗണ്‍ ആയി കളിപ്പിക്കാന്‍ ടീം മാനേജ്ന്റ് ധൈര്യം കാണിക്കാത്തത് വിമര്‍ശനത്തിന് ഇടയാക്കിയിട്ടുണ്ട്. ജോര്‍ജ് ഗാര്‍ട്ടനും തീര്‍ത്തും നിറംമങ്ങി.
(PTI Photo/Sportzpics)