ശ്രദ്ധയെല്ലാം ഇനി ഐപിഎല്ലില്‍
ലോകകപ്പ് ടീമില്‍ എത്തിപ്പെടാന്‍ സാധിക്കാത്തത് ഏറെ നിരാശാജനകമായിരുന്നെന്ന് സഞ്ജു പറഞ്ഞു. ലോകകപ്പിനുള്ള ടീമിനെ തെരഞ്ഞെടുത്തുകഴിഞ്ഞു. അതുകൊണ്ടുതന്നെ ഇനി തനിക്ക് തന്റെ മുഴുവന്‍ ശ്രദ്ധയും ഊര്‍ജവുമെല്ലാം ഐപിഎല്ലിനായി വിനിയോഗിക്കാം. ഇന്ത്യയ്ക്കുവേണ്ടി ലോകകപ്പ് കളിക്കുകയെന്നത് എല്ലാ കളിക്കാരുടേയും സ്വപ്‌നമാണ്. തനിക്കും അതിന് കഴിയുമെന്നായിരുന്നു പ്രതീക്ഷ. എന്നാല്‍, സെലക്ഷന്‍ കളിക്കാരന്റെ കൈയ്യിലല്ല. പക്വതയാര്‍ന്ന ചിന്തയിലൂടെ കളിക്കാരനെന്ന നിലയില്‍ കളിയില്‍ മാത്രം ശ്രദ്ധകേന്ദ്രീകരിക്കുകയാണ് ഇനി ചെയ്യേണ്ടതെന്നും സഞ്ജു പറഞ്ഞു.
(PTI Photo/Sportzpics for IPL)
ശ്രീലങ്കന്‍ പര്യടനം തിരിച്ചടിയായി
ഐപിഎല്ലില്‍ രാജസ്ഥാന്‍ റോയല്‍സിന്റെ ക്യാപ്റ്റനായ സഞ്ജു ചില എണ്ണംപറഞ്ഞ ഇന്നിങ്‌സുകള്‍ കൊണ്ടാണ് ക്രിക്കറ്റ് ആരാധകരുടെ ശ്രദ്ധപിടിച്ചുപറ്റിയത്. മികച്ച ഷോട്ടുകളിലൂടെ റണ്‍സ് കണ്ടെത്തുമ്പോഴും സ്ഥിരതയില്ലായ്മ വിമര്‍ശനത്തിനിടയാക്കി. അടുത്തിടെ സമാപിച്ച ശ്രീലങ്കന്‍ പര്യടനം സഞ്ജുവിനെ സംബന്ധിച്ചിടത്തോളം ലോകകപ്പിലേക്കുള്ള വാതിലായിരുന്നു. എന്നാല്‍, 3 കളികളില്‍ 11.33 ശരാശരിയോടെ 34 റണ്‍സ് മാത്രമാണ് നേടാനായത്.
(PC: AP/PTI)
സീസണില്‍ റോയല്‍സ് നേട്ടമുണ്ടാക്കും
ഐപിഎല്ലിലെ നടപ്പു സീസണില്‍ റോയല്‍സ് കിരീടലക്ഷ്യം സ്വപ്‌നം കാണുന്നുണ്ടെന്ന് സഞ്ജു പറഞ്ഞു. യുഎഇയില്‍ സമാപിച്ച കഴിഞ്ഞ സീസണില്‍ അവസാന സ്ഥാനക്കാരായിരുന്നു റോയല്‍സ്. അതില്‍നിന്നും എത്ര മുന്നോട്ടു പോകാന്‍ സാധിച്ചാലും നേട്ടമായി വിലയിരുത്തും. ഓരോ മത്സരത്തേയും വേര്‍തിരിച്ചുകണ്ട് തന്ത്രങ്ങള്‍ രൂപം നല്‍കുകയും അതിനനുസരിച്ച് കളിക്കുകയും ചെയ്യാനാണ് തീരുമാനം. എതിരാളി ആരെന്നു നോക്കാതെ മികച്ച കളി കെട്ടഴിക്കുമെന്നും സഞ്ജു ഉറപ്പുതരുന്നു.
(PTI Photo/Sportzpics for IPL)
കിരീടം ലക്ഷ്യമെന്ന് സഞ്ജു
2021 സീസണിലെ ആദ്യപാദം സമാപിക്കുമ്പോള്‍ അഞ്ചാം സ്ഥാനത്താണ് സഞ്ജുവും സംഘവും. കേവലം ആദ്യ നാലിലെത്തുകയല്ല ലക്ഷ്യമെന്നും കിരീടം തന്നെയാണെന്നും സഞ്ജു വ്യക്തമാക്കി. യുവത്വമുള്ള ടീമാണ് ഞങ്ങളുടേത്. വരാനിരിക്കുന്ന ഏഴു മത്സരങ്ങളില്‍ ജയം സാധ്യതയുള്ള കളികളുമുണ്ട്. തോറ്റാലും ജയിച്ചാലും പോരാടുകതന്നെ ചെയ്യുമെന്നും റോയല്‍സ് ക്യാപ്റ്റന്‍ വാഗ്ദാനം ചെയ്യുന്നു.
(PTI Photo/Sportzpics for IPL)