ഇന്ത്യൻ പ്രീമിയർ ലീഗിന്റെ 2024 സീസണിലേക്ക് പാറ്റ് കമ്മിൻസിനെ നായകനായി സൺ റൈസേഴ്സ് ഹൈദരാബാദ് പ്രഖ്യാപിച്ചത് കഴിഞ്ഞ ദിവസമാണ്. കഴിഞ്ഞ സീസണിൽ ടീമിനെ നയിച്ച ഐഡൻ മാർക്രത്തെ ഒഴിവാക്കിയാണ് കമ്മിൻസിനെ ഹൈദരാബാദ് അവരുടെ പുതിയ ക്യാപ്റ്റനാക്കിയത്‌. ഓസ്ട്രേലിയയെ ഏകദിന ലോകകപ്പിൽ ചാമ്പ്യന്മാരാക്കിയതിന്റെ മികവുമായാണ് കമ്മിൻസ് ഐപിഎല്ലിൽ ക്യാപ്റ്റനായെത്തുന്നത്.
എന്നാൽ കമ്മിൻസിനെ നായകനാക്കിയ ഹൈദരാബാദിന്റെ നീക്കത്തിലുള്ള ചില റിസ്കുകൾ തുറന്ന് പറഞ്ഞ് പിന്നാലെ മുൻ ഇന്ത്യൻ താരം ഇർഫാൻ പത്താൻ രംഗത്തെത്തി. കമ്മിൻസ് മികച്ച ക്യാപ്റ്റനാണെങ്കിലും ടി20 യിൽ അദ്ദേഹം അത്ര മികച്ചതല്ലെന്നാണ് ഇർഫാന്റെ പക്ഷം. ഐപിഎല്ലിലും കമ്മിൻസിന് അത്ര മികച്ച റെക്കോഡില്ലെന്ന്‌ ഇതിനൊപ്പം ഇർഫാൻ ചൂണ്ടിക്കാട്ടി.
Also Read : സഞ്ജുവല്ല, ഇത്തവണ ആ രണ്ട് രാജസ്ഥാൻ റോയൽസ് താരങ്ങളിൽ ഒരാൾ ഈ നേട്ടം സ്വന്തമാക്കും; കിടില‌ൻ പ്രവചനം നടത്തി ചഹൽ
"ക്യാപ്റ്റൻസിയെക്കുറിച്ച് പറയുമ്പോൾ കമ്മിൻസിന് അപ്പുറത്തേക്ക് ചിന്തിക്കാൻ കഴിയില്ല. ഓസ്ട്രേലിയ ലോകകപ്പ് നേടിയത് അദ്ദേഹത്തിന് കീഴിലാണ്, കഴിഞ്ഞ ഒന്നൊന്നര വർഷമായി അദ്ദേഹത്തിന്റെ പ്രകടനം മികച്ചതാണ്. എന്നാൽ ടി20 ക്യാപ്റ്റൻസിയിലേക്ക് വരുമ്പോൾ കമ്മിൻസ് ഒന്നുമല്ല. ടി20 യിൽ അദ്ദേഹത്തിന്റെ പ്രകടനം അത്ര മികച്ചതല്ല, അദ്ദേഹത്തിന്റെ ടി20 നമ്പരുകളും അത്ര നല്ലതല്ല."
"അതിനാൽ ഒരു വെല്ലുവിളിയുണ്ട്. എന്താണ് ഹൈദരാബാദ് ചിന്തിക്കുന്നത്. അവർ ഒരു വലിയ നീക്കമാണ് ഇവിടെ നടത്തിയിരിക്കുന്നത്. കമ്മിൻസിനെ ക്യാപ്റ്റനാക്കിയാൽ മാർക്രത്തിന്റെ കാര്യമോ? ഒരു വർഷത്തേക്കാണ് നിങ്ങൾ അദ്ദേഹത്തിന് ക്യാപ്റ്റൻസി നൽകിയത്. നിങ്ങൾ അദ്ദേഹത്തെ ബാക്ക് (പിന്തുണയ്ക്കാൻ) ചെയ്യാൻ ആഗ്രഹിക്കുന്നില്ലേ? അതൊരു വലിയ ചോദ്യമാണ്." ഇർഫാൻ പത്താൻ പറഞ്ഞു.
Also Read : സഞ്ജുവിന്റെ രാജസ്ഥാൻ റോയൽസ് നേരിടുന്ന ഏറ്റവും വലിയ തലവേദന അക്കാര്യം; ഇത്തവണ കിരീടം നേടണമെങ്കിൽ അവർ ഫോമിലെത്തണം
അതേ സമയം ത‌ങ്ങളുടെ രണ്ടാം ഐപിഎൽ കിരീടം ലക്ഷ്യം വെച്ചാണ് സൺ റൈസേഴ്സ് ഹൈദരാബാദ് 2024 സീസണിന് ഇറങ്ങുന്നത്. ഇക്കുറി ലേലത്തിൽ നിന്ന് കിടില‌ൻ താരങ്ങളെ സ്വന്തമാക്കിയ ഓറഞ്ച് ആർമി മികച്ച സ്ക്വാഡുമായാണ് ഈ സീസണിൽ ഇറങ്ങുക. ട്രാവിസ് ഹെഡ്, വനിന്ദു ഹസരംഗ, മാർക്കോ ജാൻസൻ, ഹെൻറിച്ച് ക്ലാസൻ, ഐഡൻ മാർക്രം, പാറ്റ് കമ്മിൻസ് എന്നിവർ അണിനിരക്കുന്ന വിദേശ താരനിര ഈ ഐപിഎല്ലിലെ തന്നെ ഏറ്റവും മികച്ചതാണ്.