IPL2020: പഞ്ചാബിന് കൂറ്റൻ ജയം.. ബാംഗ്ലൂരിന്റെ തോൽവി 97 റൺസിന്!!

ദുബായ്: ക്യാപ്റ്റൻ കെ എൽ രാഹുലിന്റെ തകർപ്പൻ ബാറ്റിംഗിന്റെ പിൻബലത്തിൽ റോയൽ ചാലഞ്ചേഴ്സ് ബാംഗ്ലൂരിനെ കിംഗ്സ് ഇലവൻ പഞ്ചാബ് 97 റൺസിന് തോൽപ്പിച്ചു. ആദ്യം ബാറ്റ് ചെയ്ത പഞ്ചാബ് 3 വിക്കറ്റ് നഷ്ടത്തിൽ 206 റൺസടിച്ചപ്പോൾ ബാംഗ്ലൂരിന്റെ മറുപടി 17 ഓവറിൽ 109 റൺസിന് അവസാനിച്ചു. 30 റൺസെടുത്ത വാഷിങ്ടൺ സുന്ദറാണ് ബാംഗ്ലൂർ നിരയിലെ ടോപ് സ്കോറർ. ഡിവില്ലിയേഴ്സ് 28ഉം ഫിഞ്ച് 20ഉം റൺസെടുത്തു. പഞ്ചാബിന് വേണ്ടി യുവ സ്പിന്നർ രവി ബിഷ്ണോയി മൂന്ന് വിക്കറ്റ് വീഴ്ത്തി. കെ എൽ രാഹുലാണ് മാൻ ഓഫ് ദി മാച്ച്.

69 പന്തിൽ 7 സിക്സും 14 ഫോറും സഹിതം 132 റൺസടിച്ച രാഹുലാണ് പഞ്ചാബിനെ ശക്തമായ ടോട്ടലിൽ എത്തിച്ചത്. ആദ്യമത്സരത്തിലെ ടോപ് സ്കോററായ മായങ്ക് അഗർവാൾ 20 പന്തിൽ 26 റൺസെടുത്ത് പുറത്തായി. നിക്കോളാസ് പൂരൻ 17ഉം മാക്സ്വെൽ 5ഉം റൺസടിച്ചു. കരുൺ നായർ 8 പന്തിൽ 15 റൺസെടുത്ത് പുറത്താകാതെ നിന്നു. ബാംഗ്ലൂരിന് വേണ്ടി ഫാസ്റ്റ് ബൌളർ നവ്ദീപ് സെയ്നി 2 വിക്കറ്റ് വീഴ്ത്തി.

നേരത്തെ ടോസ് നേടിയ ബാംഗ്ലൂർ ക്യാപ്റ്റൻ വിരാട് കോലി പഞ്ചാബിനെ ബാറ്റിംഗിനയക്കുകയായിരുന്നു. പഞ്ചാബ് നിരയിൽ ക്രിസ് ഗെയ്ൽ ഇന്നും കളിച്ചില്ല. ആദ്യമത്സരത്തിലെ ടീമിൽ നിന്നും രണ്ട് മാറ്റങ്ങളുമായാണ് പഞ്ചാബ് ഇറങ്ങിയത്. ഫാസ്റ്റ് ബൌളർ ക്രിസ് ജോർദാന് പകരം ഓൾറൌണ്ടർ ജയിംസ് നീശം ടീമിലെത്തി. ഗൌതമിന് പകരം മുരുകൻ അശ്വിൻ കളിച്ചു.

ആദ്യമത്സരം ജയിച്ച അതേ ടീമിനെത്തന്നെ ബാംഗ്ലൂർ നിലനിർത്തി. ഹൈദരാബാദ് സൺറൈസേഴ്സിനെതിരെയായിരുന്നു വിരാട് കോലി നയിക്കുന്ന ബാംഗ്ലൂരിന്റെ വിജയം. തോൽവി ഉറപ്പിച്ച ശേഷം മത്സരത്തിലേക്ക് തിരിച്ചുവന്ന ബാംഗ്ലൂർ 10 റൺസിനാണ് ഹൈദരാബാദിനെ തോൽപിച്ചത്.

ഇതിന് നേർവിപരീതമാണ് കെ എൽ രാഹുൽ നയിച്ച കിംഗ്സ് ഇലവൻ പഞ്ചാബിന്റെ കഥ. അവസാന രണ്ട് പന്തുകളിൽ ഒരു റൺ മാത്രം മതി എന്ന സ്ഥിതിയിൽ രണ്ട് വിക്കറ്റുകൾ വലിച്ചെറിഞ്ഞ പഞ്ചാബ് സൂപ്പർ ഓവറിൽ ഡൽഹി കാപിറ്റൽസിനോട് തോൽക്കുകയായിരുന്നു.