ആർസിബിക്ക് ഈ സീസണിലെ വമ്പൻ നാണക്കേട്; കൊൽക്കത്തയുടെ ആ കിടിലൻ പ്ലാൻ ക്ലിക്കായത് കളി മാറ്റി

ഐപിഎൽ പതിനേഴാം സീസണിൽ തുടർച്ചയായ രണ്ടാം ജയം നേടി ശ്രേയസ് അയ്യർ നയിക്കുന്ന കൊൽക്കത്ത നൈറ്റ് റൈഡേഴ്സ്. ബാംഗ്ലൂരിന്റെ ഹോം ഗ്രൗണ്ടായ ചിന്നസ്വാമി സ്റ്റേഡിയത്തിൽ നടന്ന കളിയിൽ ഏഴ് വിക്കറ്റിന്റെ ജയമാണ് കെകെആർ നേടിയത്. മത്സരത്തിൽ ആദ്യം ബാറ്റ് ചെയ്ത റോയൽ ചലഞ്ചേഴ്സ് ബാംഗ്ലൂർ നിശ്ചിത 20 ഓവറുകളിൽ 182/6 എന്ന മികച്ച സ്കോർ നേടിയപ്പോൾ, കൊൽക്കത്ത 19 പന്തുകൾ ബാക്കി നിൽക്കെ വിജയത്തിലെത്തി‌.

ഈ തോൽവിയോടെ ഒരു വമ്പൻ നാണക്കേടും റോയൽ ചലഞ്ചേഴ്സ് ബാംഗ്ലൂരിന്റെ പേരിലായി‌. 2024 സീസണിൽ ഹോം ഗ്രൗണ്ടിൽ തോൽക്കുന്ന ആദ്യ ടീമെന്ന നാണക്കേടാണ് ആർസിബിയുടെ പേരിലായത്‌. ഈ സീസണിൽ ആദ്യ ഒൻപത് കളികളിലും ജയിച്ചത് ഹോം ടീമുകളായിരുന്നു‌. ഹോം ഗ്രൗണ്ടിൽ കൊൽക്കത്ത നൈറ്റ് റൈഡേഴ്സിനെതിരെയുള്ള നാണം കെട്ട റെക്കോഡും ആർസിബി തുടരുകയാണ്. 2015 മുതൽ ചിന്നസ്വാമിയിൽ കളിച്ച മത്സരങ്ങളിലെല്ലാം ആർസിബി, കൊൽക്കത്ത നൈറ്റ് റൈഡേഴ്സിന് മുന്നിൽ തോൽവിയേറ്റുവാങ്ങി.


ആർസിബി ഇന്നിങ്സ്: മത്സരത്തിൽ ടോസ് നേടിയ കൊൽക്കത്ത നൈറ്റ് റൈഡേഴ്സ് , ആർസിബിയെ ബാറ്റിങ്ങിന് അയക്കുകയായിരുന്നു. വിരാട് കോഹ്ലിയുടെ ബാറ്റിങ് മികവിൽ ആർസിബി നിശ്ചിത 20 ഓവറിൽ 182/6 എന്ന കിടിലൻ സ്കോറിൽ എത്തുകയായിരുന്നു. 59 പന്തിൽ നിന്ന് നാല് വീതം ബൗണ്ടറികളും സിക്സറുകളുമടക്കം 83 റൺസ് നേടി കോഹ്ലി പുറത്താകാതെ നിന്നു. കാമറോൺ ഗ്രീൻ 21 പന്തിൽ 33 റൺസും, ഗ്ലെൻ മാക്സ്‌വെൽ 19 പന്തിൽ 28 റൺസും നേടി‌. മിന്നും ഫോമിലുള്ള ദിനേഷ് കാർത്തിക്ക് എട്ട് പന്തുകളിൽ 20 റൺസെടുത്ത് അവസാനം വെടിക്കെട്ട് നടത്തി. എട്ട് റൺസിൽ പുറത്തായ ക്യാപ്റ്റൻ ഫാഫ് ഡു പ്ലെസിസും, മൂന്ന് റൺസിൽ വീണ രജത് പട്ടീധറും നിരാശപ്പെടുത്തി‌.

പൃഥ്വി ഷായെ ഡെൽഹി കളിപ്പിക്കാത്തത് എ‌ന്ത്? പിന്നിൽ ഈ കാരണം; അവസാനം മനസ് തുറന്ന് സൗരവ് ഗാംഗുലി
കൊൽക്കത്തയുടെ പ്ലാൻ ക്ലിക്കായി: സുനിൽ നരൈനെ ഓപ്പണിങ്ങിൽ അഴിച്ചുവിടുകയെന്ന കൊൽക്കത്ത നൈറ്റ് റൈഡേഴ്സിന്റെ തന്ത്രം ക്ലിക്കാകുന്നതാണ് രണ്ടാമിന്നിങ്സിൽ കണ്ടത്. എല്ലാ പന്തും ആക്രമിക്കുക എന്ന ലക്ഷ്യത്തോടെ ക്രീസിലെത്തിയ നരൈൻ തലങ്ങും വിലങ്ങും ബോളർമാരെ അടിച്ചുപറത്തിയതോടെ കൊൽക്കത്ത സ്കോർ റോക്കറ്റ് വേഗത്തിൽ കുതിച്ചുകയറി‌. വെറും 22 പന്തുകളിൽ രണ്ട് ബൗണ്ടറികളുടെയും അഞ്ച് സിക്സറുകളുടെയും സഹായത്തോടെ 47 റൺസായിരുന്നു നരൈൻ നേടിയത്‌. പവർപ്ലേയിൽ സ്കോർ 80 കടന്നപ്പോൾത്തന്നെ കൊൽക്കത്ത ജയം ഉറപ്പിച്ചിരുന്നു. മറ്റൊരു ഓപ്പണറായ ഫിൽ സാൾട്ട് 20 പന്തിൽ 30 റൺസ് നേടി പുറത്തായി‌.

Also Read: കിടിലൻ ജയം നേടിയിട്ടും രാജസ്ഥാൻ റോയൽസ് അത്ര ഹാപ്പിയല്ല, സഞ്ജു സാംസണ് തലവേദന സമ്മാനിക്കുന്നത് ഈ രണ്ട് താരങ്ങളുടെ ഫോം

മൂന്നാം നമ്പരിൽ ബാറ്റിങ്ങിന് എത്തിയ വെങ്കടേഷ് അയ്യറും വെടിക്കെട്ട് ബാറ്റിങ്ങാണ് കെകെആറിനായി കാഴ്ചവെച്ചത്. വെറും 30 പന്തുകളിൽ നിന്ന് മൂന്ന് ബൗണ്ടറികളുടെയും നാല് സിക്സറിന്റെയും സഹായത്തോടെ അദ്ദേഹം 50 റൺസ് നേടി. 24 പന്തിൽ 39 റ‌ൺസെടുത്ത് പുറത്താകാതെ നിന്ന ക്യാപ്റ്റൻ ശ്രേയസ് അയ്യർ സിക്സറിലൂടെയാണ് കെകെആറിനെ വിജയത്തിൽ എത്തിച്ചത്.