ഐപിഎല്ലിൽ ഈ സീസണിലെ ആദ്യ പരാജയം നുണഞ്ഞതിന് ശേഷം രാജസ്ഥാൻ അവരുടെ അടുത്ത മത്സരത്തിന് ഇറങ്ങുകയാണ് ശനിയാഴ്ച. ശിഖർ ധവാൻ നയിക്കുന്ന പഞ്ചാബ് കിങ്സാണ് (Punjab Kings) ഈ കളിയിൽ സഞ്ജുവിന്റെയും ടീമിന്റെയും എതിരാളികൾ. ഗുജറാത്ത് ടൈറ്റൻസിനെതിരെ പരാജയം നേരിട്ട മത്സരത്തിൽ കളിച്ച ടീമിൽ എന്തെങ്കിലും മാറ്റം വരുത്തി രാജസ്ഥാൻ ഈ മത്സരത്തിനിറങ്ങുമോ എന്ന ആകാംക്ഷയിലാണ് ആരാധകർ. നിലവിൽ മോശം ഫോമിലുള്ള ടീമിന്റെ പ്രധാന താരത്തെ അവർ ഈ കളിയിൽ പുറത്തിരുത്തുമോ എന്നതിനായാണ് ആരാധകർ പ്രധാനമായും മറ്റു നോക്കുന്നത്. പഞ്ചാബ് കിങ്സിനെതിരായ മത്സരത്തിൽ രാജസ്ഥാ റോയൽസിന്റെ സാധ്യത പ്ലേയിങ് ഇലവൻ എങ്ങനെയായിരിക്കുമെന്ന് നോക്കാം.
ടോപ് ഓർഡർ
ഓപ്പണർ യശസ്വി ജയ്സ്വാളിന്റെ ഫോമാണ് ഈ സീസണിൽ രാജസ്ഥാൻ റോയൽസിന്റെ ഏറ്റവും വലിയ ആശങ്ക. സീസണിലെ ആദ്യ അഞ്ച് കളികളിലും തിള‌ങ്ങാൻ അദ്ദേഹത്തിന് സാധിച്ചില്ല. ഇതോടെ പഞ്ചാബ് കിങ്സിനെതിരായ മത്സരത്തിൽ നിന്ന് ജയ്സ്വാളിനെ മാറ്റണമെന്ന തരത്തിൽ സമൂഹ മാധ്യമങ്ങളിൽ അഭിപ്രായങ്ങൾ ഉയർന്നു. എന്നാൽ ടീമിന്റെ അടുത്ത അടുത്ത സൂപ്പർ താരമായ ജയ്സ്വാളിനെ പ്ലേയിങ് ഇലവനിൽ നിന്ന് മാറ്റാൻ രാജസ്ഥാൻ തയ്യാറാകില്ല. ജോസ് ബട്ലർക്കൊപ്പം ചേർന്ന് യശസ്വി തന്നെ ഇന്നും രാജസ്ഥാന്റെ ബാറ്റിങ് ഓപ്പൺ ചെയ്യും.
ആർസിബിക്കെതിരായ സെഞ്ചുറി ഒഴിച്ചു നിർത്തിയാൽ ഈ സീസണിൽ അത്ര മികച്ച റെക്കോഡല്ല ബട്ലറുടേത്. ഇന്ന് ഈ ഓപ്പണിങ് ജോഡി ക്ലിക്കാകുമെന്ന പ്രതീക്ഷയിലാണ് ആരാധകർ. ക്യാപ്റ്റൻ സഞ്ജു സാംസണാകും മൂന്നാം നമ്പരിൽ. അഞ്ച് കളികളിൽ നിന്ന് 246 റൺസ് നേടി ഉജ്ജ്വല ഫോമിലാണ് നിലവിൽ സഞ്ജു.
മധ്യനിര
ഈ സീസണിൽ സ്വപ്ന ഫോമിൽ കളിക്കുന്ന റിയാൻ പരാഗാകും പഞ്ചാബിനെതിരെയും രാജസ്ഥാൻ റോയൽസിന്റെ നാലാം നമ്പരിൽ കളിക്കുക. അഞ്ച് കളികളിൽ 261 റൺസ് നേടി നിൽക്കുകയാണ് അദ്ദേഹം. റിയാൻ തന്റെ ഫോം തുടർന്നാൽ പഞ്ചാബ് കിങ്സ് ബോളർമാർ ഇന്ന് വിയർക്കും. വെസ്റ്റിൻഡീസ് വെടിക്കെട്ട് ബാറ്റർ ഷിംറോൺ ഹെറ്റ്മെയറിനും ഇന്ത്യയുടെ ധ്രുവ് ജൂറലിനുമാകും ഫിനിഷിങ്ങിന്റെ ചുമതല.
സഞ്ജുവിന് പണി കിട്ടി
ബോളർമാർ ഇവർ
കിവീസ് സ്റ്റാർ പേസറായ ട്രെന്റ് ബോൾട്ടാകും ടീമിന്റെ പേസ് നിരയെ ഇന്ന് നയിക്കുക. ഈ സീസണിൽ പവർപ്ലേ ഓവറുകളിൽ അഞ്ച് വിക്കറ്റുകൾ വീഴ്ത്തി ഉജ്ജ്വല ഫോമിലാണ് ബോൾട്ട്. ആവേശ് ഖാനാകും മറ്റൊരു പേസർ. കഴിഞ്ഞ കളിയിൽ മൂന്ന് വിക്കറ്റുകളെടുത്ത കുൽദീപ് സെന്നോ, പരിക്ക് മാറിയെത്തുന്ന സന്ദീപ് ശർമയോ ടീമിലുണ്ടാകും. സ്പിൻ നിരയിൽ മാറ്റമുണ്ടാകില്ല. ഈ സീസണിൽ ഇതിനകം 10 വിക്കറ്റുകൾ വീഴ്ത്തിയ യുസ്വേന്ദ്ര ചഹലും സീനിയർ സ്പിന്നർ ആർ അശ്വിനും ടീമിൽ സ്ഥാനം ഉറപ്പാണ്.
രാജസ്ഥാന്റെ സാധ്യത ഇലവൻ
യശസ്വി ജയ്സ്വാൾ, ജോസ് ബട്ലർ, സഞ്ജു സാംസൺ, റിയാൻ പരാഗ്, ഷിംറോൺ ഹെറ്റ്മെയർ, ധ്രുവ് ജൂറൽ, ആർ അശ്വിൻ, ട്രെന്റ് ബോൾട്ട്, ആവേശ് ഖാൻ, യുസ്വേന്ദ്ര ചഹൽ, സന്ദീപ് ശർമ/കുൽദീപ് സെൻ.
ഇമ്പാക്ട് താരങ്ങൾ: നാന്ദ്രെ ബർഗർ, റോവ്മാൻ പവൽ, ശുഭം ദൂബെ.