ചെന്നൈ സൂപ്പർ കിങ്സിന് അടിച്ചത് വമ്പൻ ലോട്ടറി, ആ നീക്കം ഈ സീസണിലെ കളി മാറ്റും; പോയിന്റ് പട്ടികയിലും ഒന്നാമതെത്തി മഞ്ഞപ്പട
ചെന്നൈ സൂപ്പർ കിങ്സ് തുടർച്ചയായ രണ്ടാം കളിയിലും ഉജ്ജ്വല ജയം നേടി മുന്നോട്ട്. ലേലത്തിൽ നിന്ന് ടീമിനൊരു വമ്പൻ ലോട്ടറി അടിച്ചെന്ന് ഇത്തവണത്തെ ആദ്യ രണ്ട് കളികളിൽ നിന്ന് വ്യക്തമായിക്കഴിഞ്ഞു.
ഇത്തവണത്തെ ഐപിഎൽ ലേലത്തിൽ സിഎസ്കെ നടത്തിയ ഒരു നീക്കം അവർക്ക് വമ്പൻ ലോട്ടറിയായെന്ന് ആദ്യ രണ്ട് കളികളിൽ നിന്ന് വ്യക്തമായിരിക്കുകയാ‌‌ണ്. ആദ്യ രണ്ട് കളികൾ അവസാനിക്കുമ്പോൾ സിഎസ്കെയുടെ ഏറ്റവും വലിയ പോസിറ്റീവും ഗുജറാത്ത് ടൈറ്റൻസിനെതിരായ കളിയിൽ നടന്ന കാര്യങ്ങളും നോക്കാം.
രചിൻ ടീമിന് ലഭിച്ച ലോട്ടറി
കഴിഞ്ഞ വർഷം ഇന്ത്യയിൽ നടന്ന ഏകദിന ലോകകപ്പിൽ ന്യൂസിലൻഡിനായി മിന്നും പ്രകടനമാണ് യുവ ഓൾ റൗണ്ടറായ രചിൻ കാഴ്ച വെച്ചത്. ഇത് കൊ‌ണ്ടു തന്നെ 2024 സീസണ് മുന്നോടിയായുള്ള ഐപിഎൽ ലേലത്തിൽ താരത്തിന് വൻ തുക ലഭിക്കുമെന്നാണ് കരുതപ്പെട്ടിരുന്നത്. എന്നാൽ 50 ലക്ഷം രൂപ അടിസ്ഥാന വിലയ്ക്ക് ലേലത്തിനെത്തിയ രചിനെ വെറും 1.8 കോടി രൂപയ്ക്ക് ചെന്നൈ സൂപ്പർ കിങ്സിന് സ്വന്തമാക്കാനായി.
ഡെൽഹി ക്യാപിറ്റൽസും പഞ്ചാബ് കിങ്സും മാത്രമാണ് ചെന്നൈയെ കൂടാതെ രചിനായി രംഗത്തുവന്ന ടീമുകൾ. കുറഞ്ഞത് അഞ്ച് കോടി രൂപയ്ക്ക് മുകളിൽ വില പോകുമെന്ന് കരുതിയ കിവീസ് താരത്തെ രണ്ട് കോടിക്ക് താഴെ ടീമിലെത്തിക്കാനായാത് സത്യത്തിൽ ചെന്നൈ സൂപ്പർ കിങ്സിന് ലോട്ടറിയായെന്നാണ് ആദ്യ രണ്ട് കളികളിലെ അദ്ദേഹത്തിന്റെ പ്രകടന‌ങ്ങൾ വ്യക്തമാക്കുന്നത്. രചിനെ സ്വന്തമാക്കിയ നീക്കം ഈ സീസണിൽ ടീമിന്റെ തലവര മാറ്റുമെന്നാണ് ആരാധകർ ചൂണ്ടിക്കാട്ടുന്നത്.
രചിന്റെ തീപ്പൊരി ബാറ്റിങ്ങ്
2024 സീസൺ ഐപിഎല്ലിലെ ആദ്യ കളിയിൽ വെടിക്കെട്ട് ബാറ്റിങ് പുറത്തെടുത്തിരുന്ന രചിൻ, ഗുജറാത്ത് ടൈറ്റൻസിനെതിരെ നടന്ന രണ്ടാമത്തെ കളിയിലും മിന്നി. ഓപ്പണിങ്ങിറങ്ങിയ താരം വെറും 20 പന്തുകളിൽ നിന്ന് ആറ് ബൗണ്ടറികളുടെയും മൂന്ന് സിക്സറുകളുടെയും സഹായത്തോടെ 46 റൺസ് നേടിയാണ് പുറത്തായത്.
നേരത്തെ റോയൽ ചലഞ്ചേഴ്സ് ബാംഗ്ലൂരിനെതിരെ നടന്ന ആദ്യ കളിയിൽ 15 പന്തിൽ 37 റൺസായിരുന്നു രചിൻ നേടിയത്. മൂന്ന് ബൗണ്ടറികളും മൂന്ന് സിക്സറുകളുമാണ് താരത്തിന്റെ ബാറ്റിൽ നിന്ന് അന്ന് പിറന്നത്.
തോൽവിക്ക് കാരണം പറഞ്ഞ് ധവാൻ
ഗുജറാത്തിനെതിരെ ചെന്നൈയ്ക്ക് കൂറ്റൻ സ്കോർ
ഗുജറാത്ത് ടൈറ്റൻസിനെതിരെ നടന്ന മത്സരത്തിൽ ആദ്യം ബാറ്റ് ചെയ്ത ചെന്നൈ സൂപ്പർ കിങ്സ് 20 ഓവറിൽ 206/6 എന്ന കിടിലൻ സ്കോറാണ് നേടിയത്. രചിൻ രവീന്ദ്രയും 36 പന്തിൽ 46 റൺസെടുത്ത ക്യാപ്റ്റൻ റുതുരാജ് ഗെയിക്ക്വാദും ചേർന്ന് ടീമിന് തീപ്പൊരി തുടക്കമാണ് സമ്മാനിച്ചത്‌. ശിവം ദൂബെ വെടിക്കെട്ട് അർധസെഞ്ചുറി നേടിയതോടെ ടീം കൂറ്റൻ സ്കോറിലേക്ക് കുതിച്ചു. 23 പന്തിൽ രണ്ട് ബൗണ്ടറികളുടെയും അഞ്ച് സിക്സറുകളുടെയും സഹായത്തോടെ 51 റൺസാണ് ദൂബെ നേടിയത്.
സിഎസ്കെയുടെ കൂറ്റൻ വിജയം
207 റൺസ് വിജയലക്ഷ്യം പിന്തുടർന്ന കൊൽക്കത്ത നൈറ്റ് റൈഡേഴ്സിന്റെ മറുപടി 20 ഓവറിൽ 143/8 ൽ അവസാനിക്കുകയായിരുന്നു. 37 റൺസ് നേടിയ സായ് സുദർശനാണ്‌ ചേസിങ്ങിൽ ഗുജറാത്തിന്റെ ടോപ് സ്കോറർ. മറ്റാർക്കും കാര്യമായ സംഭാവനകൾ ടീമിനായി നൽകാൻ സാധിക്കാതെ വന്നതോടെയാണ് ഗുജറാത്ത് പരാജയത്തിലേക്ക് വീണത്. ചെന്നൈയ്ക്ക് വേണ്ടി ദീപക് ചഹർ, മുസ്താഫിസുർ റഹ്മാൻ, തുഷാർ ദേഷ്പാണ്ടെ എന്നിവർ രണ്ട് വിക്കറ്റുകൾ വീതം വീഴ്ത്തി.