അതേ സമയം മലയാളി താരം സഞ്ജു സാംസൺ നയിക്കുന്ന ടീമായതിനാൽ രാജസ്ഥാന്റെ വിജയമാണ് ഇന്ന് കേരളക്കര ആഗ്രഹിക്കുന്നത്. എന്നാൽ ലീഗ് ഘട്ടത്തിലെ ഒന്നാം സ്ഥാനക്കാരായ, സീസണിൽ രണ്ട് തവണ നേർക്കുനേർ വന്നപ്പോളും തങ്ങളെ പരാജയപ്പെടുത്തിയ ഗുജറാത്തിനെതിരായ കലാശപ്പോരാട്ടം റോയൽസിന് അത്രയെളുപ്പമാകില്ല. എന്നാൽ ചില കാര്യങ്ങൾ സംഭവിച്ചാൽ രാജസ്ഥാൻ തന്നെ ഇക്കുറി കപ്പ് പൊക്കും. അവ എന്തൊക്കെയെന്ന് നോക്കാം.
റാഷിദിനെതിരെ ബട്ലർ പിടിച്ചു നിൽക്കണം
ഇന്നത്തെ മത്സരത്തിൽ രാജസ്ഥാൻ റോയൽസിന്റെ പ്രധാന പ്രതീക്ഷ ജോസ് ബട്ലറാണെങ്കിൽ ഗുജറാത്തിന്റെ പ്രതീക്ഷ റാഷിദ് ഖാനാണ്. ജോസ് ബട്ലർക്കെതിരെ മികച്ച റെക്കോർഡുള്ള താരമാണ് റാഷിദ് ഖാൻ. ഇംഗ്ലീഷ് താരത്തിനെതിരെ 41 പന്തുകളെറിഞ്ഞിട്ടുള്ള റാഷിദ് നാല് തവണ അദ്ദേഹത്തെ പുറത്താക്കുകയും ചെയ്തു. റാഷിദിനെതിരെ ഇന്ന് പിടിച്ചു നിൽക്കാനും കഴിഞ്ഞ മത്സരങ്ങളിൽ കാഴ്ച വെച്ച ഫോം ആവർത്തിക്കാനും ബട്ലർക്ക് കഴിഞ്ഞാൽ രാജസ്ഥാന്റെ വിജയം ഇന്ന് സുനിശ്ചിതം.
സഞ്ജു കൂടുതൽ ഉത്തരവാദിത്വം കാണിക്കണം
രാജസ്ഥാൻ റോയൽസിന്റെ നായകനായ സഞ്ജു സാംസൺ ഇന്ന് ബാറ്റിംഗിൽ കുറച്ച് കൂടി ഉത്തരവാദിത്വം കാട്ടേണ്ടത് പ്രധാനമാണ്. ആദ്യ പന്ത് മുതൽക്കേ കൂറ്റൻ ഷോട്ടുകൾക്ക് ശ്രമിക്കുന്ന രീതിയാണ് സഞ്ജുവിന്റേത്. എന്നാൽ ഇന്ന് ഷോട്ട് സെലക്ഷനിൽ താരം അല്പം കൂടി ശ്രദ്ധിക്കേണ്ടത് അനിവാര്യമാണ്. ഫൈനൽ പോലൊരു നിർണായക മത്സരത്തിൽ സഞ്ജുവിനെപ്പോലൊരു താരത്തിന്റെ വിക്കറ്റ് അതീവ നിർണായകമാണ്. ടീമിന്റെ ജയ സാധ്യതയെ അത് വളരെയധികം സ്വാധീനിക്കുകയും ചെയ്യും. കഴിഞ്ഞ മത്സരത്തിൽ അനാവശ്യമായി വിക്കറ്റ് വലിച്ചെറിഞ്ഞ സഞ്ജുവിന് ഇന്ന് കൂടുതൽ നേരം ക്രീസിൽ ചിലവഴിക്കാനായാൽ രാജസ്ഥാന് കാര്യങ്ങൾ എളുപ്പമാകും.
റാഷിദിനെ തൂക്കാൻ രാജസ്ഥാന് ഹെറ്റ്മെയറുണ്ട്
ഗുജറാത്ത് ബോളിംഗിന്റെ തുറുപ്പ് ചീട്ടായ റാഷിദ് ഖാനെതിരെ മികച്ച റെക്കോർഡുള്ള റോയൽസ് ബാറ്ററാണ് ഷിംറോൺ ഹെറ്റ്മെയർ. റാഷിദിനെതിരെ 45 ബോളുകൾ കളിച്ചിട്ടുള്ള ഹെറ്റ്മെയറിന് 140 എന്ന മികച്ച സ്ട്രൈക്ക് റേറ്റാണ് അദ്ദേഹത്തിനെതിരെയുള്ളത്. ഗുജറാത്ത് ബോളിംഗിന്റെ എല്ലാമെല്ലാമായ റാഷിദിനെതിരായ ഉജ്ജ്വല റെക്കോർഡ് ഇന്നും തുടരാൻ ഹെറ്റ്മെയർക്ക് കഴിഞ്ഞാൽ അത് രാജസ്ഥാന്റെ വിജയ സാധ്യതകൾ വർധിപ്പിക്കും.
പവർപ്ലേയിൽ വിക്കറ്റ് വീഴ്ത്താൻ കഴിയണം
പവർപ്ലേയിൽ രാജസ്ഥാൻ പേസർമാർ വീഴ്ത്തുന്ന വിക്കറ്റുകൾ ഈ സീസണിലെ അവരുടെ ഉജ്ജ്വല കുതിപ്പിൽ നിർണായക പങ്ക് വഹിച്ചിട്ടുണ്ട്. ട്രെന്റ് ബോൾട്ട്, പ്രസിദ് കൃഷ്ണ എന്നിവരിൽ ആരെങ്കിലും സീസണിലെ ഭൂരിഭാഗം മത്സരങ്ങളിലും പവർപ്ലേയിൽ രാജസ്ഥാന് വേണ്ടി വിക്കറ്റുകൾ വീഴ്ത്തിയിട്ടുണ്ട്. ഫൈനൽ പോലൊരു നിർണായക മത്സരത്തിൽ പവർപ്ലേയിൽ വിക്കറ്റുകൾ വീഴ്ത്തുന്നത് എതിർ ടീമിന്റെ ആത്മവിശ്വാസം അമ്പേ തകർക്കും. അത് കൊണ്ടു തന്നെ ഇന്ന് പവർപ്ലേയിൽ വിക്കറ്റുകൾ വീഴ്ത്താൻ രാജസ്ഥാൻ ബോളർമാർക്കായാൽ മത്സരത്തിലും അവർക്ക് നിർണായക ആധിപത്യം ലഭിക്കും.
ഈ താരങ്ങൾ ഫോമിലെത്തണം
ഈ സീസണിലെ പർപ്പിൾ ക്യാപ്പ് ലിസ്റ്റിൽ രണ്ടാം സ്ഥാനത്തുള്ള റോയൽസ് സ്പിന്നർ യുസ്വേന്ദ്ര ചഹലിന് അവസാന മത്സരത്തിൽ വിക്കറ്റുകളൊന്നും വീഴ്ത്താനായിരുന്നില്ല. എന്നാൽ ഫൈനൽ പോലൊരു നിർണായാക വേദിയിൽ അദ്ദേഹം ഫോമിലേക്ക് മടങ്ങിയെത്തേണ്ടത് രാജസ്ഥാൻ റോയൽസിന്റെ ആവശ്യമാണ്. യുസ്വേന്ദ്ര ചഹലിനും ഒപ്പം ടീമിലെ മറ്റൊരു സ്പിന്നറായ ആർ അശ്വിനും ഇന്ന് ഫോമിലേക്കുയരാനായാൽ രാജസ്ഥാൻ കിരീടത്തിലേക്ക് കുതിക്കും.
മക്കോയുടെ ഡെത്ത് ഓവറുകൾ പ്രധാനം
സീസണിന്റെ അവസാന ഘട്ടമെത്തിയപ്പോളേക്കും രാജസ്ഥാൻ റോയൽസിന്റെ പ്രധാന ഡെത്ത് ബോളറായി മാറിയ കളികാരനാണ് ഒബെദ് മക്കോയ്. കഴിഞ്ഞ രണ്ട് മത്സരങ്ങളിലും മനോഹരമായി ഡെത്ത് ഓവറുകൾ കൈകാര്യം ചെയ്ത മക്കോയ് ആർസിബിക്കെതിരെ രണ്ടാം ക്വാളിഫയറിൽ 4 ഓവറുകളിൽ 22 റൺസ് വിട്ടു കൊടുത്ത് വീഴ്ത്തിയത് 3 വിക്കറ്റുകൾ. ഒരിക്കൽക്കൂടി ഈ സീസണിൽ ഉജ്ജ്വല ഡെത്ത് ബോളിംഗ് കാഴ്ച വെക്കാൻ മക്കോയ്ക്ക് ആയാൽ കിരീടം രാജസ്ഥാന്റെ കൂടെ പോരും.
Also Read : ഐപിഎല്ലിനിടെ ഇംഗ്ലണ്ടിലൊരു വെടിക്കെട്ട് സെഞ്ച്വറി; അടുത്ത ഐപിഎല്ലില്‍ ഈ താരത്തെ എത്തിക്കണമെന്ന് ആരാധകർ