ഐപിഎല്ലിലെ ഏറ്റവും മികച്ച ടീം
ഈ ദശകത്തിലെ ഏറ്റവും മികച്ച ഐപിഎൽ ടീമിനെ പ്രഖ്യാപിച്ചിരിക്കുകയാണ് വിസ്ഡൻ. മികച്ച ഏകദിന ടീമിനെയും ടെസ്റ്റ് ടീമിനെയും നേരത്തെ തന്നെ പ്രഖ്യാപിച്ചുരുന്നു. ടെസ്റ്റ് ടീമിൽ വിരാട് കോലിയും അശ്വിനും ഇടം പിടിച്ചപ്പോൾ ഏകദിന ടീമിൽ കോലി, രോഹിത്, എംഎസ് ധോണി എന്നിവർ സ്ഥാനം പിടിച്ചു. ദശകത്തിലെ ഏറ്റവും മികച്ച അഞ്ച് ക്രിക്കറ്റർമാരിലും കോലിയുണ്ട്. ഇതാ വിസ്ഡൻ പ്രഖ്യാപിച്ച ഈ ദശകത്തിലെ ഏറ്റവും മികച്ച ഐപിഎൽ ടീം.
വിദേശ താരങ്ങൾ ഇവർ
പതിനൊന്ന് പേരടങ്ങുന്ന ടീമിൽ നാല് വിദേശകളിക്കാരാണ് ഉള്ളത്. ക്രിസ് ഗെയിൽ ആണ് ടീമിൻെറ ഓപ്പണർ. മധ്യനിരയിൽ റോയൽ ചലഞ്ചേഴ്സ് ബാംഗ്ലൂർ താരം എബി ഡീവില്ലിയേഴ്സും കൊൽക്കത്ത നൈറ്റ് റൈഡേഴ്സിൻെറ വിൻഡീസ് താരം സുനിൽ നരെയ്നും ഉണ്ട്. ലസിത് മലിംഗയാണ് മറ്റൊരു വിദേശതാരം.
മുംബൈ - ചെന്നൈ ആധിപത്യം
മുംബൈ ഇന്ത്യൻസിൻെറയും ചെന്നൈ സൂപ്പർ കിങ്സിൻെറയും ആധിപത്യമാണ് ടീമിലുള്ളത്. മൂന്ന് മുംബൈ കളിക്കാരും മൂന്ന് ചെന്നൈ താരങ്ങളും ടീമിലുണ്ട്. റോയൽ ചലഞ്ചേഴ്സ് ബാംഗ്ലൂരിൽ നിലവിൽ കളിക്കുന്ന രണ്ട് പേരാണ് ടീമിലുള്ളത്.
നായകൻ രോഹിത് ശർമ
രോഹിത് ശർമയെയാണ് ഈ ദശകത്തിലെ ഐപിഎൽ ടീമിൻെറ നായകനായി വിസ്ഡൻ പ്രഖ്യാപിച്ചിരിക്കുന്നത്. ഐപിഎല്ലിൽ നാല് തവണ കിരീടം നേടിയിട്ടുള്ള ഏക നായകനാണ് രോഹിത്. കഴിഞ്ഞ സീസണിലാണ് മഹേന്ദ്ര സിങ് ധോണിയെ മറികടന്ന് മുംബൈ ഇന്ത്യൻസ് നായകനായ രോഹിത് ഈ നേട്ടം കൈവരിച്ചത്.
ടീം ഇവരിൽ നിന്ന്
രോഹിത് ശർമ (ക്യാ), ക്രിസ് ഗെയിൽ, സുരേഷ് റെയ്ന, വിരാട് കോലി, എബി ഡീവില്ലിയേഴ്സ്, എംഎസ് ധോണി (വി.കീ), രവീന്ദ്ര ജഡേജ, സുനിൽ നരെയ്ൻ, ലസിത് മലിംഗ, ഭുവനേശ്വർ കുമാർ, ജസ്പ്രീത് ബുംറ.