ഇനി അഞ്ച് മത്സരങ്ങളാണ് ലീഗ് ഘട്ടത്തിൽ രാജസ്ഥാന് അവശേഷിക്കുന്നത്. ഇതിൽ പരമാവധി കളികളിൽ ജയിച്ച് പോയിന്റ് പട്ടികയിൽ ആദ്യ രണ്ട് സ്ഥാനങ്ങിൽ ഒന്നിൽ ഫിനിഷ് ചെയ്യാനാകും അവരുടെ ശ്രമം. പോയിന്റ് പട്ടികയിൽ മുന്നിലുള്ള രണ്ട് ടീമുകൾക്ക് ഫൈനലിൽ എത്താൻ രണ്ട് അവസരങ്ങൾ ലഭിക്കും. അതേ സമയം പ്ലേ ഓഫിലെത്തുമ്പോൾ രാജസ്ഥാൻ റോയൽസിന് ഒരു വലിയ പണി കിട്ടും എന്നതാണ് ആരാധകരെ ഇപ്പോൾ ആശങ്കപ്പെടുത്തുന്നത്. ടീമിന്റെ ഒരു സൂപ്പർ താരം പ്ലേ ഓഫിൽ കളിക്കില്ല എന്നതാണ് അത്. ഇതോടെ പ്ലേ ഓഫിൽ ടീമിന്റെ തന്ത്രങ്ങളിൽ മാറ്റം വരുത്താനും രാജസ്ഥാൻ നിർബന്ധിതരാകും.
ജോസ് ബട്ലർ കളിക്കില്ല
രാജസ്ഥാൻ റോയൽസിന്റെ ഏറ്റവും പ്രധാന താരവും അവരുടെ ഓപ്പണറുമായ ജോസ് ബട്ലറാണ് ഇത്തവണ പ്ലേ ഓഫിൽ കളിക്കില്ലെന്ന് ഉറപ്പായിരിക്കുന്നത്. ടി20 ലോകകപ്പിനുള്ള ഇംഗ്ലണ്ട് ടീമിനെ കഴിഞ്ഞ ദിവസമാണ് പ്രഖ്യാപിച്ചത്. ജോസ് ബട്ലറാണ് ഈ ടീമിന്റെ നായകൻ.
ലോകകപ്പ് ടീമിലേക്ക് തെരഞ്ഞെടുക്കപ്പെട്ട ഇംഗ്ലണ്ട് താരങ്ങളെല്ലാം മെയ് 22 ന് പാകിസ്ഥാനെതിരെ ആരംഭിക്കാനിരിക്കുന്ന ടി20 പരമ്പരയ്ക്ക് മുന്നോടിയായി നാട്ടിലേക്ക് മടങ്ങി എത്തണമെന്ന് ഇംഗ്ലണ്ട് ആൻഡ് വെയിൽസ് ക്രിക്കറ്റ് ബോർഡ് അറിയിച്ചു. ഇതോടെയാണ് ജോസ് ബട്ലർ അടക്കമുള്ള ഇംഗ്ലീഷ് താരങ്ങൾക്ക് പ്ലേ ഓഫിന് മുൻപ് നാട്ടിലേക്ക് മടങ്ങേണ്ടി വരുന്നത്. മെയ് 19 നാണ് ലീഗ് ഘട്ടത്തിൽ രാജസ്ഥാൻ റോയൽസിന്റെ അവസാന മത്സരം. ഈ കളിക്ക് ശേഷം ബട്ലർ നാട്ടിലേക്ക് മടങ്ങുമെന്നാണ്‌ സൂചന.
ബട്ലറിന്റെ ഈ സീസണിലെ പ്രകടനം
രാജസ്ഥാൻ റോയൽസിന്റെ എക്കാലത്തെയും മികച്ച താരങ്ങളിൽ ഒരാളാണ് ജോസ് ബട്ലർ. 2018 മുതൽ അവർക്കായി കളിക്കുന്ന അദ്ദേഹം ഓപ്പണിങ്ങിൽ സ്ഥിരതയാർന്ന പ്രകടനമാണ് കാഴ്ചവെക്കുന്നത്. ഈ സീസണിലും മികച്ച ഫോമിലാണ് അദ്ദേഹം. എട്ട് കളികളിൽ നിന്ന് 53.17 ബാറ്റിങ് ശരാശരിയിൽ 319 റൺസാണ് നേടിയത്. റോയൽ ചലഞ്ചേഴ്സ് ബാംഗ്ലൂരിനെതിരെയും, കൊൽക്കത്ത നൈറ്റ് റൈഡേഴ്സിനെതിരെയും സെഞ്ചുറി നേടാൻ അദ്ദേഹത്തിനായി.
ലോകകപ്പിൽ സഞ്ജു ഫോം തുടരുമോ
രാജസ്ഥാന് തന്ത്രങ്ങൾ മാറ്റേണ്ടി വരും
അതേ സമയം ജോസ് ബട്ലർ നാട്ടിലേക്ക് മടങ്ങുന്നതോടെ പ്ലേ ഓഫിൽ തന്ത്രങ്ങൾ മാറ്റാൻ രാജസ്ഥാൻ റോയൽസ് നിർബന്ധിതരാകും. പ്ലേയിങ് ഇലവനിൽ അടക്കം പ്ലേ ഓഫിൽ രാജസ്ഥാന് മാറ്റങ്ങൾ വരുത്തേണ്ടി വരും. ഈ സീസണിൽ ഒരു മത്സരത്തിൽ ജോസ് ബട്ലർ കളിക്കാൻ ഇറങ്ങിയിരു‌ന്നില്ല. പരിക്കിനെത്തുടർന്ന് പഞ്ചാബ് കിങ്സിനെതിരായ മത്സരമാണ് ബട്ലർക്ക് നഷ്ടമായത്. അന്ന് തനുഷ് കൊട്ടിയാനെ ഓപ്പണിങ്ങിൽ അയച്ച് രാജസ്ഥാൻ വൻ പരീക്ഷണം നടത്തി. ഈ നീക്കം വൻ ഫ്ലോപ്പാവുകയും ചെയ്തു.
ഇനി പ്ലേ ഓഫിലും ബട്ലർ ഇല്ലെന്ന് ഉറപ്പായതോടെ പുതിയ ഓപ്പണിങ് ജോഡിയെ ഈ പ്രധാന മത്സരങ്ങളിൽ ഇറക്കേണ്ട അവസ്ഥയിലാണ്‌ രാജസ്ഥാൻ. വിന്നിങ് കോമ്പിനേഷനിൽ ഉൾപ്പെടെ മാറ്റം കൊണ്ടുവരുന്നത് രാജാഥാന്റെ താളം തെറ്റിക്കാനും സാധ്യതയുണ്ട്‌.
രാജസ്ഥാന്റെ ശേഷിക്കുന്ന മത്സരങ്ങൾ
മെയ് രണ്ടിന് സൺ റൈസേഴ്സ് ഹൈദരാബാദിന് എതിരെയാണ് രാജസ്ഥാൻ റോയൽസിന്റെ അടുത്ത മത്സരം. മെയ് ഏഴിന് ഡെൽഹി ക്യാപിറ്റൽസിനെതിരെ കളിക്കുന്ന അവർ, മെയ് 12 ന് ചെന്നൈ സൂപ്പർ കിങ്സിനെതിരെ ഇറങ്ങും. മെയ് 15 ന് പഞ്ചാബ് കിങ്സിനെതിരെയും, മെയ് 19 ന് കൊൽക്കത്ത നൈറ്റ് റൈഡേഴ്സിനെയും രാജസ്ഥാൻ നേരിടും.