സഞ്ജുവിന്റെ രാജസ്ഥാൻ റോയൽസിന് ഒരു തിരിച്ചടി കിട്ടാൻ സാധ്യത, ഭീഷണി നൽകി ഈ ടീം; പിന്നിലേക്ക് പോകുമോ

ശ്രേയസ് അയ്യർ നയിക്കുന്ന കൊൽക്കത്ത നൈറ്റ് റൈഡേഴ്സാണ് രാജസ്ഥാൻ റോയൽസിന്റെ ഒന്നാം സ്ഥാനത്തിന് ഭീഷണിയായി രംഗത്തുള്ളത്. നിലവിൽ 10 കളികളിൽ നിന്ന് ഏഴ് വിജയവും മൂന്ന് തോൽവികളുമുള്ള കെകെആർ 14 പോയിന്റുമായി ലീഗിൽ രണ്ടാം സ്ഥാനത്താണ്. രാജസ്ഥാൻ റോയൽസിനാകട്ടെ 10 കളികളിൽ 16 പോയിന്റുണ്ട്‌. എന്നാൽ അടുത്ത കളിയിൽ കെകെആർ വിജയിച്ചാൽ അവരുടെ പോയിന്റ് നേട്ടം 16 ലെത്തും.

പോയിന്റ് നിലയിൽ രാജസ്ഥാനൊപ്പം തുല്യത പാലിച്ചാലും മികച്ച നെറ്റ് റൺ റേറ്റ് ഉള്ളതിനാൽ കൊൽക്കത്ത ഒന്നാം സ്ഥാനത്താകും. ഇതോടെ ഏറെനാളുകളായി വിലസിയിരുന്ന ഒന്നാം സ്ഥാനം റോയൽസിന് നഷ്ടമാകും. നിലവിൽ +0.622 ആണ് രാജസ്ഥാൻ റോയൽസിന്റെ നെറ്റ് റൺ റേറ്റ്. കെകെആറിന്റേതാവട്ടെ +1.098.

കൊൽക്കത്ത നൈറ്റ് റൈഡേഴ്സിന്റെ അടുത്ത മത്സരം ഞായറാഴ്ച ലക്നൗ സൂപ്പർ ജയന്റ്സിന് എതിരെയാണ്. നിലവിൽ 10 കളികളിൽ നിന്ന് 12 പോയിന്റുള്ള കെ എൽ രാഹുലിന്റെ ടീമും പ്ലേ ഓഫ് യോഗ്യതയ്ക്കായി ശക്തമായി രംഗത്തുള്ള ടീമാ‌ണ്. അതിനാൽ അവർക്കെതിരായ മത്സരം കെകെആറിന് ഒട്ടും എളുപ്പമാകില്ല. എന്നാൽ നിലവിലെ ഫോം തുടർന്ന് അവർക്കെതിരെയും വിജയിക്കാൻ സാധിച്ചാൽ ഞായറാഴ്ച ഐപിഎൽ പോയിന്റ് പട്ടികയിലെ ഒന്നാം സ്ഥാനത്തേക്ക് രാജകീയമായി മാർച്ച് ചെയ്യാൻ കെകെആറിന് സാധിക്കും. അതുകൊണ്ടു തന്നെ ഞായറാഴ്ചത്തെ കളിയിൽ കൊൽക്കത്ത പരാജയപ്പെടാനാണ് രാജസ്ഥാൻ ആരാധകർ ആഗ്രഹിക്കുന്നത്.

ഐപിഎൽ 2024 സീസണിൽ ടോപ് 2 ഫിനിഷ് തന്നെയാണ് രാജസ്ഥാൻ റോയൽസിന്റെ ലക്ഷ്യം. ആദ്യ രണ്ട് സ്ഥാനങ്ങളിൽ ഫിനിഷ് ചെയ്യുന്ന ടീമുകൾ ആദ്യ ക്വാളിഫയറിലേക്കാണ് യോഗ്യത നേടുന്നത്‌. ഇവർക്ക് ഫൈനലിൽ എത്താൻ രണ്ട് അവസരങ്ങൾ ലഭിക്കും. നിലവിലെ ഫോമിൽ രാജസ്ഥാന് ടോപ് 2 ഫിനിഷ് അനായാസമായിരിക്കുമെന്നാണ് കരുതപ്പെടുന്നത്. 10 കളികളിൽ എട്ടെണ്ണത്തിലും കിടിലൻ ജയമാണ് സഞ്ജുവും സംഘവും നേടിയത്‌. തോൽവി നേരിട്ട മത്സരങ്ങളാവട്ടെ അവസാന ബോൾ ത്രില്ലറുകളായിരുന്നു‌.

അവസാന കളിയിൽ സൺ റൈസേഴ്സ് ഹൈദരാബാദിനോട് ഒരു റൺസിന് തോറ്റ രാജസ്ഥാൻ റോയൽസിന്റെ അടുത്ത മത്സരം വരുന്ന ചൊവ്വാഴ്ചയാണ്. ഡെൽഹി ക്യാപിറ്റൽസാണ് ഈ കളിയിൽ അവരുടെ എതിരാളികൾ. ഡെൽഹിയിൽ വെച്ചാണ് ഈ കളി നടക്കുന്നത്.