‌ചെന്നൈ സൂപ്പർ കിങ്സ് ടീമിൽ ഇന്ന് മാറ്റമുണ്ടാകുമോ? അവൻ ഇന്നും പുറത്തിരിക്കും; സാധ്യത പ്ലേയിങ് ഇലവൻ അറിയാം

പതിനേഴാം സീസൺ ഇന്ത്യൻ പ്രീമിയർ ലീഗിലെ തങ്ങളുടെ മൂന്നാം മത്സരത്തിൽ ഇന്ന് ഡെൽഹി ക്യാപിറ്റൽസിനെ നേരിടാൻ ഒരുങ്ങുകയാണ് ചെന്നൈ സൂപ്പർ കിങ്സ്. ആദ്യ ര‌ണ്ട് മത്സരങ്ങളിലും വിജയിച്ച് പോയിന്റ് പട്ടികയിൽ ഒന്നാം സ്ഥാനത്താണ് സിഎസ്കെ. അതേ സമയം കളിച്ച രണ്ട് മത്സരങ്ങളിലും തോറ്റ് നിൽക്കുകയാണ് ഋഷഭ് പന്തിന്റെ ഡെൽഹി. മൂന്നാം ജയം നേടാൻ ചെന്നൈയും ആദ്യ‌ ജയത്തിനായി ഡെൽഹിയും ഇറങ്ങുമ്പോൾ ഒരു ആവേശപ്പോരാട്ടം തന്നെ ആരാധകർക്ക് പ്രതീക്ഷിക്കാം.വിന്നിങ് കോമ്പിനേഷനിൽ അഴിച്ചുപണികൾ നടത്താൻ ഇഷ്ടപ്പെടാത്ത ടീമാണ് ചെന്നൈ സൂപ്പർ കിങ്സ്. കഴിഞ്ഞ മത്സരത്തിൽ കിടിലൻ ജയം നേടിയതിന് ശേഷമെത്തുന്ന അവർ അത് കൊണ്ടു തന്നെ ടീമിൽ മാറ്റം വരുത്താൻ സാധ്യത കുറവാണ്. സ്റ്റാർ ഓൾറൗണ്ടർ ഷർദുൽ താക്കൂറിന് ഇന്നും പുറത്തിരിക്കേണ്ടി വരുമെന്ന് ചുരുക്കം. ഡെൽഹി ക്യാപിറ്റൽസിനെതിരായ മത്സരത്തിന് മണിക്കൂറുകൾ മാത്രം ബാക്കി നിൽക്കെ ചെന്നൈയുടെ സാധ്യത പ്ലേയിങ് ഇലവൻ എങ്ങനെയാണെന്ന് നോക്കാം.


രണ്ട് മത്സരങ്ങൾ കൊണ്ടു തന്നെ ചെന്നൈ സൂപ്പർ കിങ്സിന്റെ സൂപ്പർ താരമായി മാറിയ ന്യൂസിലൻഡ് താരം രചിൻ രവീന്ദ്രയും ക്യാപ്റ്റൻ റുതുരാജ് ഗെയിക്ക്വാദും ചേർന്നാകും ഡെൽഹി ക്യാപിറ്റൽസിനെതിരെയും ചെന്നൈയുടെ ബാറ്റിങ് ഓപ്പൺ ചെയ്യുക. ഇവർക്ക് ഒരിക്കൽക്കൂടി മികച്ച തുടക്കം നൽകാനായാൽ ഡെൽഹിക്കെതിരെ ചെന്നൈയ്ക്ക് കാര്യങ്ങൾ എളുപ്പമാകും.

Also Read: 155.8 കിലോമീറ്റർ വേഗതയിൽ ഒരു പന്ത്, എറിഞ്ഞതെല്ലാം തീയുണ്ട; ഇത് ഇന്ത്യയുടെ അക്തറെന്ന് ക്രിക്കറ്റ് ലോകം, മയങ്ക് യാദവിനെക്കുറിച്ച് അറിയാം

ഇന്ത്യൻ സൂപ്പർ താരം അജിങ്ക്യ രഹാനെയാകും ടീമിന്റെ മൂന്നാം നമ്പർ ബാറ്റർ. ചെന്നൈയിൽ എത്തിയത് മുതൽ മറ്റൊരു തലത്തിലാണ്‌ രഹാനെ കളിക്കുന്നത്. ഈ സീസണിലെ താരലേലത്തിൽ വൻ തുകയ്ക്ക്‌‌ സ്വന്തമാക്കിയ ഡാരിൽ മിച്ചലാകും നാലാം നമ്പരിൽ. വെടിക്കെട്ട് ബാറ്റിങ്ങിന്റെ ആശാനായ ശിവം ദൂബെയും, ഓൾറൗണ്ടർ രവീന്ദ്ര ജഡേജയും ബാറ്റിങ് ഓർഡറിൽ പിന്നാലെയെത്തും.

സമീർ റിസ്വിയാണ് ബാറ്റിങ് നിരയിലെ‌ മറ്റൊരു സർപ്രൈസ് പാക്കേജ്. കഴിഞ്ഞ കളിയിൽ വെടിക്കെട്ട് ബാറ്റിങ് കാഴ്ചവെക്കാൻ അദ്ദേഹത്തിന്‌ സാധിച്ചിരുന്നു. വിക്കറ്റ് കീപ്പറായി എം എസ്‌ ധോണി തന്നെയിറങ്ങും. മുസ്താഫിസുർ നയിക്കുന്ന പേസ് നിരയിൽ ദീപക് ചഹറും, തുഷാർ ദേഷ്പാണ്ടെയും അണിനിരക്കും. ഇമ്പാക്ട് താരമായി മതീഷ പതിരാന ഇറങ്ങാനാണ് സാധ്യത.

Also Read: രാഹുലിനെ ക്യാപ്റ്റൻസിയിൽ നിന്ന് മാറ്റിയതിന് കാരണം ഇതാണ്; ലക്നൗവിന്റെ ആ തന്ത്രം ലാംഗറിന്റെ ബുദ്ധി

ചെന്നൈയുടെ സാധ്യത ഇലവൻ ഇങ്ങനെ: റുതുരാജ് ഗെയിക്ക്വാദ് (ക്യാപ്റ്റൻ), രചിൻ രവീന്ദ്ര, അജിങ്ക്യ രഹാനെ, ഡാരിൽ മിച്ചൽ, ശിവം ദൂബെ, രവീന്ദ്ര ജഡേജ, സമീർ റിസ്വി, എം എസ്‌ ധോണി, ദീപക് ചഹർ, തുഷാർ ദേഷ്പാണ്ടെ, മുസ്താഫിസുർ റഹ്മാൻ.