Kane Williamson: ഓറഞ്ച് ക്യാപ്പിനൊപ്പം അപൂര്‍വ നേട്ടവും കൈയ്യടക്കി കെയ്ന്‍ വില്യംസൺ

മുംബൈ: ഐ.പി.എല്‍ പതിനൊന്നാം സീസണ്‍ കലാശപ്പോരാട്ടത്തില്‍ കരുത്തരായ ചെന്നൈയോട് ഏറ്റുമുട്ടി പരാജയപ്പെട്ടങ്കിലും ഹൈദരാബാദ് നായകന്‍ കെയ്ന്‍ വില്യംസണിന് തലകുനിക്കേണ്ടി വന്നില്ല. മത്സരത്തില്‍ പലരും തലയില്‍ പൊന്‍ കിരീടമായി ചൂടിയ ഓറഞ്ച് ക്യാപ്പിനൊപ്പം അപൂര്‍വ്വ നേട്ടവും സ്വന്തമാക്കിയാണ് ഹൈദരാബാദ് നായകൻ ന്യൂസിലന്‍റിലേക്ക് പറക്കുന്നത്. 16 മത്സരങ്ങളില്‍ നിന്നായി 735 റണ്‍സ് കൈയ്യടക്കിയാണ് താരം മിന്നും പ്രകടനം കാഴ്ചവെച്ചത്.

ഒരു സീസണില്‍ ഏറ്റവുമധികം റണ്‍സ് നേടുന്ന മൂന്നാമത്തെ താരമെന്ന അപൂര്‍വ്വ നേട്ടവും കെയ്ന്‍ വില്യംസണിന് സ്വന്തമാണ്. വിരാട് കോഹ്ലിക്കും ഡേവിഡ് വാര്‍ണര്‍ക്കും പിന്നാലെയാണ് കെയ്ന്‍ വില്യംസണ്‍ ഈ നേട്ടം സ്വന്തമാക്കിയിരിക്കുന്നത്.

17 മാച്ചില്‍ എട്ടു ഹാഫ് സെഞ്ച്വറികളുൾപ്പെടെ 52.5 ആവറേജില്‍ 735 റണ്‍സാണ് കെയ്ന്‍ സ്വന്തമാക്കിയത്. ഇതിനു മുന്‍പ് അഞ്ച് ബാറ്റ്സ്മാന്‍മാര്‍ മാത്രമേ 700 റണ്‍സ് പിന്നിട്ടിട്ടുള്ളൂ. ഇന്ത്യന്‍ പ്രീമിയര്‍ ലീഗിന്‍റെ ഫൈനല്‍ മത്സരത്തോടു കൂടി ഒരു സീസണില്‍ 700ലേറെ റണ്‍സെടുക്കുന്ന മൂന്നാമത്തെ നായകന്‍ കൂടിയാണ് കെയ്ന്‍ വില്യംസണ്‍. 735 റണ്‍സ് നേടിയ വില്യംസണ്‍ ഹസിയെയും ഗെയിലിനെയും മറികടന്നാണ് കെയ്ന്‍ വില്യംസണ്‍ ഈ നേട്ടം കുറിച്ചത്.