ഐപിഎല്‍ ഇലവനുമായി സെവാഗ്, സ‍ർപ്രൈസ് ക്യാപ്റ്റൻ; മുംബൈ ഇന്ത്യന്‍സില്‍ നിന്നും രണ്ടുപേര്‍ മാത്രം!!

പഞ്ചാബിന്റെ കെഎല്‍ രാഹുലും ആര്‍സിബിയുടെ ദേവദത്ത് പടിക്കലുമാണ് സെവാഗിന്റെ ടീമിന്റെ ഓപ്പണര്‍മാര്‍. ഏറ്റവും കൂടുതല്‍ റണ്‍സ് നേടി ഓറഞ്ച് തൊപ്പി നേടിയ കളിക്കാരനാണ് രാഹുല്‍. 14 കളികളില്‍ നിന്നും 670 റണ്‍സാണ് രാഹുല്‍ നേടിയത്. ആദ്യ സീസണില്‍ തന്നെ തിളങ്ങിയ ദേവദത്ത് ഇത്തവണ ഉയര്‍ന്നുവരുന്ന കളിക്കാരനുള്ള അവാര്‍ഡ് നേടിയിരുന്നു. 15 കളികളില്‍ നിന്നും 473 റണ്‍സാണ് താരം നേടിയത്.

മുംബൈ ഇന്ത്യന്‍സിന്റെ സൂര്യകുമാര്‍ യാദവാണ് സെവാഗിന്റെ മൂന്നാം നമ്പര്‍ ബാറ്റ്‌സ്മാന്‍. 16 കളികളില്‍ നിന്നും സൂര്യ 480 റണ്‍സോടെ ഒരു ഐപിഎല്‍ സീസണില്‍ കൂടി സ്ഥിരതയാര്‍ന്ന പ്രകടനം കാഴ്ചവെച്ചു. 145.01 സ്‌ട്രൈക്ക് റേറ്റില്‍ 40 റണ്‍സ് ആണ് ശരാശരി. കഴിഞ്ഞ രണ്ട് സീസണിലും സൂര്യയുടെ പ്രകടനം ഗംഭീരമായിരുന്നു. 2018ല്‍ 512 റണ്‍സും 2019ല്‍ 424 റണ്‍സും ഐപിഎല്ലില്‍ നേടുകയുണ്ടായി.

Also Read: കിരീടം നേടിയിട്ടും കാര്യമില്ല; മുംബൈ ഇന്ത്യന്‍സില്‍ നിന്നും ഈ മൂന്നു വിദേശ കളിക്കാരെ ഒഴിവാക്കും!

ടീം ക്യാപ്റ്റനായ വിരാട് കോലിയാണ് നാലാം നമ്പറില്‍. എട്ട് ഐപിഎല്‍ സീസണില്‍ ബാംഗ്ലൂരിനെ നയിച്ച വിരാട് കോലിക്ക് ഒരു കിരീടംപോലും നേടാനായിട്ടില്ലെങ്കിലും ക്യാപ്റ്റനാക്കാന്‍ സെവാഗ് മടികാണിച്ചില്ല. ഇക്കുറി 15 കളികളില്‍നിന്നും കോലി 466 റണ്‍സ് നേടിയിരുന്നു. ബാംഗ്ലൂരിനെ പ്ലേ ഓഫിലെത്തിക്കാന്‍ കോലിക്ക് കഴിഞ്ഞു. എന്നാല്‍, എലിമിനേറ്ററില്‍ ഹൈദരാബാദിനോട് തോറ്റ് പുറത്താവുകയായിരുന്നു.

സണ്‍റൈസേഴ്‌സിന്റെ ഡേവിഡ് വാര്‍ണറേയും ആര്‍സിബിയുടെ എഡി ഡി വില്ലിയേഴ്‌സിനേയും സെവാഗ് മധ്യനിരയില്‍ കളിപ്പിക്കും. കാഗിസോ റബാഡ, ജസ്പ്രീത് ബുംറ, മുഹമ്മദ് ഷമി എന്നിവരാണ് പേസര്‍മാര്‍. റാഷിദ് ഖാന്‍, യുസ്‌വേന്ദ്ര ചാഹല്‍ എന്നിവര്‍ സ്പിന്നര്‍മാരുമാകും. മുംബൈയുടെ ഇഷാന്‍ കിഷനാണ് പന്ത്രണ്ടാം സ്ഥാനത്ത്. പതിമൂന്നാമനായി ജോഫ്ര ആര്‍ച്ചറേയും ഉള്‍പ്പെടുത്തി. രോഹിത് ശര്‍മ, ശിഖര്‍ ധവാന്‍ എന്നിവരെ സെവാഗ് പരിഗണിച്ചില്ല.