ലോകകപ്പിൽ നാലാം നമ്പറിലേക്ക് രാഹുൽ; ഉഴപ്പിയാൽ റായിഡുവിൻെറ പണിപാളും

ന്യൂഡൽഹി: ഐപിഎല്ലിലെ പ്രകടനം ലോകകപ്പ് ടീമിലേക്കുള്ള മാനദണ്ഡം ആവില്ലെന്ന് നേരത്തെ തന്നെ ഇന്ത്യൻ ടീമിൻെറ ചീഫ് സെലക്ടർ എംഎസ്കെ പ്രസാദ് വ്യക്തമാക്കിയിരുന്നു. എന്നാൽ ഐപിഎൽ പ്രകടനം ബിസിസിഐക്ക് പാടെ തള്ളിക്കളയാനാവില്ല. ഇന്ത്യൻ ടീമിലെ നാലാം നമ്പർ സ്ഥാനം വലിയ തലവേദനയായിരുന്നു. ഒടുവിൽ അമ്പാട്ടി റായിഡുവിനെ ഉറപ്പിച്ചിരുന്നു.

എന്നാൽ അക്കാര്യത്തിൽ കാര്യങ്ങൾ ഇനിയും മാറിയേക്കുമെന്നാണ് സൂചനകൾ. കഴിഞ്ഞ ഐപിഎല്ലിലെ മികച്ച പ്രകടനമാണ് റായിഡുവിനെ ടീമിലെത്തിച്ചത്. എന്നാൽ ചെന്നൈക്ക് വേണ്ടി ഇത്തവണ താരം അത്ര മികച്ച പ്രകടനമല്ല നടത്തുന്നത്. എന്നാൽ രാഹുലാവട്ടെ കിങ്സ് ഇലവൻ പഞ്ചാബിനായി സ്ഥിരതയാർന്ന പ്രകടനമാണ് കാഴ്ച വെക്കുന്നത്.

രണ്ട് അർധശതകങ്ങൾ രാഹുൽ നേടിക്കഴിഞ്ഞു. മുംബൈ ഇന്ത്യൻസിനെതിരെയും ഹൈദരാബാദിനെതിരെയും അദ്ദേഹം അർധസെഞ്ച്വറി നേടി. റായിഡു മികച്ച പ്രകടനം നടത്തിയില്ലെങ്കിൽ സെലക്ടർമാർ രാഹുലിനെ പരിഗണിച്ചേക്കും.