മലിംഗ ഒഴിവായേക്കും; മുംബൈ ഇന്ത്യൻസിലേക്ക് ഓസീസ് സൂപ്പർതാരം

മുംബൈ: ശ്രീലങ്കൻ പേസർ ലസിത് മലിംഗയെ ഇനി അധികകാലം മുംബൈ ഇന്ത്യൻസിന് ലഭിക്കില്ലെന്ന് സൂചന. ഇത് വരെ രണ്ട് മത്സരങ്ങളിലാണ് മലിംഗ മുംബൈക്കായി കളിച്ചത്. ആദ്യ മത്സരത്തിലും അദ്ദേഹം ടീമിനൊപ്പം ഇല്ലായിരുന്നു. ലങ്കയുടെ ഏകദിന ക്യാപ്റ്റൻ കൂടിയായ മലിംഗ നാട്ടിലേക്ക് മടങ്ങുകയാണ്. ലങ്കയിലെ പ്രൊവിൻഷ്യൽ ടൂർണമെൻറിൽ പങ്കെടുക്കാനാണ് മലിംഗ മടങ്ങുന്നത്.

എന്നാൽ തിരിച്ചടിക്ക് പുറമെ മുംബൈ ഇന്ത്യൻസിന് ഒരു സന്തോഷവാർത്ത. ഓസ്ട്രേലിയൻ സൂപ്പർ താരം ജേസണ്‍ ബെഹ്രന്‍ഡോര്‍ഫ് ടീമിലേക്ക് എത്തുകയാണ്. ഫോമിലുള്ള ഓസീസ് പേസർ എത്തുന്നത് ടീമിന് കരുത്ത് പകരും. പാകിസ്ഥാനെതിരായ ഏകദിന പരമ്പരയ്ക്ക് ശേഷം ബെഹ്രന്‍ഡോര്‍ഫ് മുംബൈ ഇന്ത്യൻസിനൊപ്പം ചേരും.