Asia cup 2018: ധ​വാ​ന്‍, രോ​ഹി​ത് കൂ​ട്ടു​കെട്ടിൽ ഇന്ത്യ ഫൈനലിൽ

ദുബായ്: സൂപ്പർ ഫോറിൽ ധവാൻ-രോഹിത് ഉശിരൻ കൂട്ടുകെട്ടിന്‍റെ പിൻബലത്തിൽ ഇന്ത്യ ഏഷ്യാ കപ്പ് ഫൈനലില്‍. പാകിസ്ഥാനെ 9 വിക്കറ്റിനാണ് ഇന്ത്യ പരാജയപ്പെടുത്തിയത്. പാകിസ്ഥാന്‍ ഉയര്‍ത്തിയ 238 റണ്‍സ് വിജയലക്ഷ്യം ഇന്ത്യ 39.3 ഓവറില്‍ ഒരു വിക്കറ്റ് നഷ്ടത്തില്‍ നേടുകയായിരുന്നു. ഓപ്പണര്‍മാരായ രോഹിത് ശര്‍മയുടെയും (111*) ശിഖര്‍ ധവാന്‍റെ (114) യും സെഞ്ചുറിയുടെ ബലത്തിലാണ് ഇന്ത്യയുടെ ഫൈനൽ പ്രവേശനം.

വിജയത്തിനരികെയെത്തിയപ്പോഴാണ് ധവാൻ റണ്ണൗട്ടായത്. പിന്നെ റായിഡുവെത്തി വിജയമുറപ്പിച്ചു.
ആദ്യം ബാറ്റു ചെയ്ത പാക്കിസ്ഥാന്‍ നിശ്ചിത ഓവറില്‍ ഏഴു വിക്കറ്റ് നഷ്ടത്തില്‍ 237 റണ്‍സാണ് നേടിയത്. ഷോയബ് മാലിക്കിന്‍റെ അര്‍ധസെഞ്ചുറി പ്രകടനം മാത്രമാണ് അവർക്ക് എടുത്തുപറയാനുണ്ടായിരുന്നത്.

ഇന്ത്യയുടെ കുൽദീപ് യാദവ്, ജസ്പ്രീത് ബുമ്ര, യുസ്‌വേന്ദ്ര ചാഹൽ എന്നിവരാണ് അവസാന ഓവറുകളിൽ പാകിസ്ഥാനെ പിടിച്ചുകെട്ടുന്നതിൽ അധ്വാനിച്ചത്. ഇവർ രണ്ടു വിക്കറ്റ് വീതം വീഴ്ത്തി പാകിസ്ഥാന് കടുത്ത പ്രഹരം നൽകി. മൂന്ന് വിക്കറ്റിന് 58 എന്ന നിലയിൽ നിന്നാണ് പാകിസ്ഥാൻ താരതമ്യേന ഭേദപ്പെട്ട സ്കോറിലേക്കെത്തിയതെന്നതും ശ്രദ്ധേയമാണ്.

കഴിഞ്ഞ ദിവസം ബംഗ്ലാദേശിനെ നേരിട്ട അതേ ടീമുമായാണ് ഇന്ത്യ പാകിസ്ഥാനെതിരെ ഇറങ്ങിയിരിക്കുന്നത്. എന്നാൽ പാകിസ്ഥാന്‍ ടീമിൽ രണ്ട് മാറ്റങ്ങളുണ്ട്. ഷദാബ് ഖാനും മുഹമ്മദ് ആമിറും ടീമില്‍ ഇടംപിടിച്ചിട്ടുണ്ട്. ഹാരിസ് സൊഹയ്‌ലിനും ഉസ്മാന്‍ ഖാനും പകരമാണിത്. ഗ്രൂപ്പ് ഘട്ടത്തില്‍ ഇന്ത്യ പാകിസ്ഥാനെ പരാജയപ്പെടുത്തിയിരുന്നു.