​ഡീ വില്ലിയേഴ്‍സ് ആദ്യ മൂന്ന് ഏകദിനങ്ങളിൽ കളിക്കില്ല

ഡർബൻ: ഇന്ത്യക്കെതിരായ ഏകദിന പരമ്പര തുടങ്ങും മുമ്പ് ദക്ഷിണാഫ്രിക്കയ്ക്ക് തിരിച്ചടി. ആതിഥേയരുടെ നിരയിലെ ഏറ്റവും ആക്രമണകാരിയായ ബാറ്റ്സ്മാൻ എബി ഡീ വില്ലിയേഴ്‍സിന് ആദ്യ മൂന്ന് മത്സരങ്ങൾ നഷ്ടമാവും. വിരലിനേറ്റ പരിക്കാണ് താരത്തിന് തിരിച്ചടിയായത്.

ഫെബ്രുവരി നാലിനാണ് ആറ് മത്സരങ്ങളുള്ള പരമ്പര തുടങ്ങുന്നത്. അതേ സമയം ഡീ വില്ലിയേഴ്‍സിന് പകരക്കാരനായി ആരെയും ദക്ഷിണാഫ്രിക്ക ടീമിൽ ഉൾപ്പെടുത്തിയിട്ടില്ല. വാണ്ടറേഴ്സ് ടെസ്റ്റിൽ ഇന്ത്യൻ ക്യാപ്റ്റൻ വിരാട് കോഹ്‍ലിയുടെ ക്യാച്ച് എടുക്കാനുള്ള ശ്രമത്തിനിടെയാണ് ഡീ വില്ലിയേഴ്‍സിന് പരിക്കേറ്റത്.

ഇന്ത്യക്കെതിരെ മികച്ച റെക്കോ‍ർഡുള്ള താരമാണ് ഡീ വില്ലിയേഴ്‍സ്. ടെസ്റ്റ് പരമ്പരയിലും അദ്ദേഹം മികച്ച പ്രകടനമാണ് പുറത്തെടുത്തത്. രണ്ടാഴ്ചയെങ്കിലും വിശ്രമം വേണ്ടി വരുമെന്നാണ് ഡോക്ട‍ർമാർ നി‍ർദ്ദേശിച്ചിരിക്കുന്നത്.