അഫ്‍ഗാനില്‍ നിന്നെത്തിയ അതിശയ സ്‍പിന്നര്‍...

ഐപിഎല്‍ കളിക്കാന്‍ ആദ്യമായാണ് രണ്ട് അഫ്‍ഗാനിസ്ഥാന്‍ താരങ്ങള്‍ എത്തിയത്. പണക്കൊഴുപ്പിന്‍റെ ലീഗില്‍ ഒരു അസോസിയേറ്റ് രാജ്യത്ത് നിന്ന് രണ്ട് കളിക്കാര്‍ക്ക് അവസരം ലഭിച്ചത് തന്നെ വലിയ സംഭവമായാണ് എല്ലാവരും കൊണ്ടാടിയത്.

ഐപിഎല്‍ തുടങ്ങിയപ്പോള്‍ തന്നെ തന്‍റെ വിലയറിയിച്ചുകഴിഞ്ഞു അതിലൊരാള്‍. വെറും 19 വയസ്സുകാരനായ റഷീദ് ഖാന്‍ ആണ് ഐപിഎല്ലിലെ ഇന്നത്തെ ഹീറോ. സണ്‍റൈസേഴ്‍സിന് വേണ്ടി ഗുജറാത്ത് ലയണ്‍സിന്‍റെ മൂന്നു വിക്കറ്റ് പിഴുത റഷീദ് ഖാന്‍, രണ്ടു മത്സരങ്ങള്‍ കഴിഞ്ഞപ്പോള്‍ ഐപിഎല്ലിലെ ഏറ്റവും അധികം വിക്കറ്റ് നേടിയ താരവുമാണ്.

ഗുജറാത്തിന് എതിരെയുള്ള മത്സരത്തില്‍ നാല് ഓവറില്‍ 19 റണ്‍സ് മാത്രം വിട്ടുകൊടുത്ത് മൂന്നു വിക്കറ്റ് അദ്ദേഹം വീഴ്‍ത്തി. മാന്‍ ഓഫ് ‍ദി മാച്ചുമായി. ഇന്നെടുത്ത മൂന്നു വിക്കറ്റുകളില്‍ ഗുജറാത്ത് ക്യാപ്റ്റന്‍ റെയ്‍നയുടെ വിക്കറ്റുമുണ്ട്. ഇതോടെ ടൂര്‍ണമെന്‍റില്‍ അഞ്ച് വിക്കറ്റുകളുമായി മുന്നിലാണ് റഷീദ് ഖാന്‍.

നാല് കോടി രൂപ മുടക്കിയാണ് സണ്‍റൈസേഴ്‍സ് ഈ സ്‍പിന്‍ ബൗളറെ സ്വന്തം പാളയത്തില്‍ എത്തിച്ചത്. ഇതിനോടകം അഭിനന്ദനങ്ങള്‍ റഷീദിനെ തേടിയെത്തിക്കഴിഞ്ഞു. ക്രിക്കറ്റിലെ അടുത്ത സൂപ്പര്‍സ്റ്റാറാകും റഷീദ് എന്ന് ഹൈദരാബാദ് ക്യാപ്റ്റന്‍ ഡേവിഡ് വാര്‍ണര്‍ തന്നെ റഷീദിനെക്കുറിച്ച് പറ‍ഞ്ഞുകഴിഞ്ഞു.

Afghan player Rashid Khan sizzles in debut IPL season