അനില്‍ കുംബ്ലെ പുതിയ ഇന്ത്യന്‍ കോച്ച്

മുംബൈ: ഇന്ത്യന്‍ ക്രിക്കറ്റ് ടീമിന്റെ പുതിയ പരിശീലകനായി മുന്‍ ക്യാപ്റ്റനും സ്പിന്‍ ഇതിഹാസവുമായ അനില്‍ കുംബ്ലയെ ബിസിസിഐ നിയമിച്ചു. ബാറ്റിംഗ്, ബൗളിംഗ് കോച്ചുകള്‍ പിന്നീട്‌ തീരുമാനിക്കും. ഒരു വര്‍ഷമാണ് കുംബ്ലെയുടെ കാലവധി. ബിസിസിഐ പ്രസിഡന്റ് അനുരാഗ് ഠാക്കൂറാണ് ഇക്കാര്യം അറിയിച്ചത്. സച്ചിന്‍, ഗാംഗുലി, ലക്ഷ്മണ്‍ എന്നിവരടങ്ങിയ ഉപദേശക സമിതിയാണ് അഭിമുഖത്തിന് ശേഷം കുംബ്ലയെ പരിശീലക സ്ഥാനത്തേക്ക് നിര്‍ദ്ദേശം ചെയ്തത്.

ഇന്ത്യക്ക് വേണ്ടി 132 ടെസ്റ്റ് മത്സരങ്ങള്‍ കളിച്ചിട്ടുള്ള കുംബ്ലെ 2,506 റണ്‍സും 619 വിക്കറ്റുകളും നേടിയിട്ടുണ്ട്. മുന്‍ ടീം ഡറക്ടര്‍ രവി ശാസ്ത്രി ഉള്‍പ്പെടെയുള്ള പ്രശസ്തരെ പിന്തള്ളിയാണ് കുംബ്ലെ ടീം ഇന്ത്യയുടെ പരിശീലക സ്ഥനത്തേക്ക് എത്തിയിരിക്കുന്നത്. ഇന്ത്യന്‍ ടീമിന്റെ പരിശീലക സ്ഥാനത്തേക്ക് 57 പേരാണ് അപേക്ഷിച്ചിരുന്നത്. ഇന്ത്യന്‍ ക്രിക്കറ്റ് ലോകത്തിന് സമ്മാനിച്ച സ്പിന്‍ ഇതിഹാസമായിരുന്നു അനില്‍ കുംബ്ലെ. ജിം ലേക്കറിന് ശേഷം ടെസ്റ്റ് ക്രിക്കറ്റില്‍ ഒരിന്നിംഗ്‌സില്‍ പത്ത് വിക്കറ്റും കരസ്ഥമാക്കുന്ന ചരിത്ര നേട്ടത്തിനും ഉടമയാണ് കര്‍ണാടകക്കാരനായ കുംബ്ലെ.