താൻ ഐപിഎൽ വാതുവെയ്പ് നടത്തിയതായി നടൻ അര്‍ബാസ് ഖാൻ

താനെ: ഇന്ത്യൻ പ്രീമിയര്‍ ലീഗിൽ വാതുവെച്ചിട്ടുണ്ടെന്ന് സമ്മതിച്ച് ബോളിവുഡ് താരവും നിര്‍മാതാവുമായ അര്‍ബാസ് ഖാൻ. സൂപ്പര്‍ താരം സൽമാൻ ഖാന്‍റെ സഹോദരനാണ് അര്‍ബാസ് ഖാൻ. ആറുവര്‍ഷമായി താൻ വാതുവെയ്ക്കുന്നുണ്ടെന്നും ഈ സീസണലും വാതുവെയ്പ് നടത്തിയതായും നടൻ സമ്മതിച്ചതായാണ് റിപ്പോര്‍ട്ട്.

ചോദ്യം ചെയ്യലിന് ഹാജരാകാൻ ആവശ്യപ്പെട്ട് മഹാരാഷ്ട്രയിലെ താനെ പോലീസ് അര്‍ബാസ് ഖാന് സമൻസ് അയച്ചിരുന്നു. അധോലോകനായകൻ ദാവൂദ് ഇബ്രാഹിമിന്‍റെ ഡി കമ്പനിയുമായി ബന്ധമുള്ള സോനു ജലാൻ, സോനു മലാദ് എന്നിവരുള്‍പ്പെടെ നാലുപേര്‍ അറസ്റ്റിലായിരുന്നു. ഇവരുമായി ബന്ധപ്പെട്ടുള്ള സംശയനിവാരണത്തിനാണ് അര്‍ബാസിനെ വിളിച്ചുവരുത്തിയതെന്ന് ഡിസിപി (ക്രൈം) അഭിഷേക് ത്രിമുഖൈ പറഞ്ഞു. സോനു ജലാനാണ് പോലീസിനോട് അര്‍ബാസിന്‍റെ പേരു വെളിപ്പെടുത്തിയത്.

വാതുവയ്പിൽ തോറ്റ അര്‍ബാസ് തനിക്ക് 2.8 കോടി രൂപ തരാനുണ്ടെന്നും കിട്ടാതായതോടെ താരത്തെ ഭീഷണിപ്പെടുത്തിയെന്നും സോനു പോലീസിനോട് പറഞ്ഞു. അന്വേഷണത്തിൽ ഇരുവരും തമ്മിലുള്ള ബന്ധം വ്യക്തമായതോടെയാണ് ചോദ്യം ചെയ്യലിന് ഹാജരാകാൻ അര്‍ബാസിന് പോലീസ് നോട്ടീസ് നല്‍കിയത്.

ബോളിവുഡ് ലോകവുമായി അടുത്ത ബന്ധമുള്ള ഇയാളുടെ സംഘത്തിന് വര്‍ഷത്തിൽ 100 കോടിയിലേറെ രൂപയുടെ ലാഭം ലഭിക്കുന്നുണ്ടന്ന് പോലീസ് പറഞ്ഞു.