അരങ്ങേറ്റത്തിൽ പൂജ്യത്തിന് പുറത്തായി അർജുൻ ടെണ്ടുൽക്കർ

കൊളംബോ: അന്താരാഷ്ട്ര ക്രിക്കറ്റിലെ തൻെറ അരങ്ങേറ്റ മത്സരത്തിൽ പൂജ്യത്തിന് പുറത്തായി അർജുൻ ടെണ്ടുൽക്കർ. ഇതിഹാസതാരം സച്ചിൻ ടെണ്ടുൽക്കറുടെ മകൻ അർജുൻ ഇന്ത്യൻ അണ്ടർ 19 ടീമിനായി ശ്രീലങ്കക്കെതിരായ യൂത്ത് ടെസ്റ്റിലാണ് ബാറ്റിങിൽ നിരാശപ്പെടുത്തിയത്. നേരത്തെ ബോളിങിൽ തൻെറ ആദ്യ രണ്ടോവറിനുള്ളിൽ അർജുൻ വിക്കറ്റ് വീഴ്ത്തിയിരുന്നു.

11 പന്ത് നേരിട്ടാണ് അർജുൻ റണ്ണൊന്നുമെടുക്കാതെ പുറത്തായത്. എന്നാൽ സച്ചിൻെറ ഏകദിന അരങ്ങേറ്റവും സമാനമായ രീതിയിലായിരുന്നു. 1989ൽ പാകിസ്ഥാനെതിരെ കളിച്ച ആദ്യ ഏകദിനത്തിൽ സച്ചിൻ പൂജ്യത്തിന് പുറത്തായിരുന്നു.

ഇടങ്കയ്യൻ പേസറാണ് അർജുൻ ടെണ്ടുൽക്കർ. ആദ്യം ബാറ്റ് ചെയ്ത ലങ്കക്കെതിരെ 11 ഓവർ എറിഞ്ഞ അർജുൻ 33 റൺസ് വഴങ്ങി ഒരു വിക്കറ്റ് എടുത്തിരുന്നു.