അർജുൻ ടെണ്ടുൽക്കറുടെ ഇഷ്‍ട ക്രിക്കറ്റ് താരങ്ങൾ ഇവരാണ്

ന്യൂഡൽഹി: ജൂനിയർ ക്രിക്കറ്റിൽ മികച്ച പ്രകടനങ്ങളുമായി താരമാവുകയാണ് സച്ചിൻെറ മകൻ അർജുൻ ടെണ്ടുൽക്കർ. കഴിഞ്ഞ ദിവസം ഓസ്ട്രേലിയയിൽ നടന്ന മത്സരത്തിൽ 27 പന്തിൽ 48 റൺസും, നാല് വിക്കറ്റുമെടുത്ത് താൻ ഒരു മികച്ച ഓൾ റൗണ്ടറാണെന്ന് സച്ചിൻ ജൂനിയ‍ർ തെളിയിച്ചു.

ഫാസ്റ്റ് ബൗളറായ അ‍ർജുൻെറ ക്രിക്കറ്റിലെ ഇഷ്ടതാരം പക്ഷേ സച്ചിനല്ല. ഓസീസ് ഫാസ്റ്റ് ബൗള‍ർ മിച്ചൽ സ്റ്റാ‍ർക്കും ഇംഗ്ലണ്ട് ഓൾ റൗണ്ട‍ർ ബെൻ സ്റ്റോക‍്‍സുമാണ് യുവതാരത്തിൻെറ മാതൃകകൾ. ഓസീസിലെ മികച്ച പ്രകടനത്തിന് ശേഷമായിരുന്നു അ‍ർജുൻെറ വെളിപ്പെടുത്തൽ.

ഓസ്ട്രേലിയയിൽ സ്പിരിറ്റ് ഓഫ് ക്രിക്കറ്റ് ഗ്ലോബൽ ചലഞ്ച് ടൂർണമെൻറിലാണ് കഴിഞ്ഞ ദിവസം ഇന്ത്യയുടെ ഇതിഹാസ ക്രിക്കറ്റ് താരത്തിൻെറ മകൻ ബാറ്റ് കൊണ്ടും പന്ത് കൊണ്ടും ഇന്ദ്രജാലം തീർത്തത്. ഹോങ് കോങ് ക്രിക്കറ്റ് ക്ലബ്ബിനെതിരെ ക്രിക്കറ്റ് ക്ലബ്ബ് ഓഫ് ഇന്ത്യക്കായി കളിക്കളത്തിലിറങ്ങിയ അർജുൻ 27 പന്തിൽ നിന്ന് 48 റൺസെടുക്കുകയും എതിർ ടീമിൻെറ നാല് വിക്കറ്റെടുക്കുകയും ചെയ്തു.