Asia Cup 2018: ഇന്ത്യ-ബംഗ്ലാദേശ് മുഖാമുഖം - ഏഷ്യാ കപ്പ് ഫൈനല്‍ ഇന്ന്

ദുബായ്: പാകിസ്ഥാനെ തളച്ച് ബംഗ്ലാദേസ് ഏഷ്യാ കപ്പ് ഫൈനലില്‍ കടന്നു. ഇന്ന് ദുബായ് രാജ്യാന്തര ക്രിക്കറ്റ് സ്റ്റേഡിയത്തില്‍ നടക്കുന്ന ഫൈനലിൽ ഇന്ത്യയെ നേരിടാനൊരുങ്ങുകയാണ് ബംഗ്ലാദേശ്. ഓള്‍റൗണ്ടര്‍ ഷാക്കിബ് അല്‍ ഹസ്സന്‍റെ പരിക്കാണ് ബംഗ്ലാദേശ് ടീമിനെ ഇപ്പോള്‍ വലയ്ക്കുന്നത്. ഷാക്കിബ് ഫൈനലിൽ കളിക്കില്ലെന്നാണ് അറിയുന്ന വിവരം.

അദ്ദേഹത്തെ ശസ്ത്രക്രിയയ്ക്കായി അമേരിക്കയിലേക്ക് കൊണ്ടുപോകേണ്ട സാഹചര്യമാണെന്ന് ബംഗ്ലാദേശ് ക്രിക്കറ്റ് ബോര്‍ഡ് അറിയിച്ചിട്ടുണ്ട്. കഴിഞ്ഞ നിദാഹാസ് ടി20 മത്സരത്തില്‍ ബംഗ്ലാദേശിനെ തോല്‍പ്പിച്ച്‌ ഇന്ത്യ നിദാഹാസ് ട്രോഫി നേടിയിരുന്നു. ഏഷ്യാകപ്പ് ജേതാക്കള്‍ ആരാകുമെന്ന് ഇന്നറിയാം.

വെള്ളിയാഴ്ച വൈകിട്ട് അഞ്ചിനാണ് ഏഷ്യ കപ്പ് ഫൈനല്‍ മത്സരം നടക്കുന്നത്. കളിച്ച മത്സരങ്ങളൊന്നും തോറ്റിട്ടില്ലെന്നത് ഇന്ത്യയുടെ ആത്മവിശ്വാസം ഉയര്‍ത്തുന്നുണ്ട്. എന്നാല്‍ അഫ്ഗാനിസ്ഥാനുമായി നടന്ന അവസാന മത്സരം സമനിലയിൽ കലാശിച്ചിരുന്നു.