Asia Cup: ഇന്ത്യയെ ഞെട്ടിച്ച് ഹോങ്കോങ് പിടിമുറുക്കുന്നു

ദുബായ്: ഏഷ്യാകപ്പിലെ താരതമ്യേന ദുർബലരായ ഹോങ്കോങ് ഇന്ത്യയെ ഞെട്ടിക്കുന്നു. 286 റൺസ് വിജയലക്ഷ്യം തേടിയിറങ്ങിയ ഹോങ്കോങിന് മികച്ച തുടക്കമാണ് ലഭിച്ചിരിക്കുന്നത്. ഓപ്പണർ നിസാകത് ഖാൻ അർധശതകം തികച്ചു. 15 ഓവറുകൾ പിന്നിട്ടിട്ടും ഹോങ്കോങിൻെറ ഒരു വിക്കറ്റ് പോലും വീഴ്ത്താൻ ഇന്ത്യൻ ബോളർമാർക്ക് സാധിച്ചിട്ടില്ല.

നിലവിൽ 18 ഓവറിൽ വിക്കറ്റൊന്നും നഷ്ടപ്പെടാതെ 101 റൺസെടുത്തിട്ടുണ്ട്. ക്യാപ്റ്റൻ അൻഷുമാൻ റാത് 32 റൺസുമായി ക്രീസിലുണ്ട്. നിസാകത് ഖാൻ 60 റൺസെടുത്തു. ആദ്യം ബാറ്റ് ചെയ്ത ഇന്ത്യ 50 ഓവറിൽ 7 വിക്കറ്റ് നഷ്ടത്തിൽ 285 റൺസെടുത്തു. ഓപ്പണർ ശിഖർ ധവാൻ സെഞ്ച്വറി നേടി. ധവാൻെറ പതിനാലാം ഏകദിന സെഞ്ച്വറിയാണിത്.

നേരത്തെ അമ്പാട്ടി റായിഡു അർധശതകം നേടിയിരുന്നു. ക്യാപ്റ്റൻ രോഹിത് ശർമ്മ 23 റൺസെടുത്തു. റായിഡു 70 പന്തിൽ നിന്ന് 60 റൺസെടുത്തു. ധവാൻ 120 പന്തിൽ നിന്ന് 127 റൺസ് എടുത്തു. കേദാർ ജാദവ് 28 റൺസെടുത്തു.