Ind Vs Aus: രണ്ടാം ടെസ്റ്റിൻെറ ആദ്യദിനം ഓസീസ് 277/6

പെർത്ത്: മികച്ച നിലയിൽ തുടങ്ങിയ ഓസീസ് ബാറ്റിങ് നിരയെ പിടിച്ച് കെട്ടി ഇന്ത്യൻ ബോളർമാർ. ഒന്നാം ദിനം മത്സരം അവസാനിപ്പിക്കുമ്പോൾ ആതിഥേയർ 6 വിക്കറ്റ് നഷ്ടത്തിൽ 277 റൺസെടുത്തിട്ടുണ്ട്. ഓപ്പണർമാരായ ആരോൺ ഫിഞ്ചും മാർക്കസും ഹാരിസും മധ്യനിര ബാറ്റ്സ്മാൻ ട്രാവിസ് ഹെഡും ഓസ്ട്രേലിയക്കായി അർധശതകങ്ങൾ നേടി.


ഇന്ത്യക്കായി ഹനുമ വിഹാരിയും ഇശാന്ത് ശർമ്മയും രണ്ട് വീതം വിക്കറ്റുകൾ വീഴ്ത്തി. ജസ്പ്രീത് ബുംറയും ഉമേഷ് യാദവും ഓരോ വിക്കറ്റ് വീതം വീഴ്ത്തി. ടോസ് നേടിയ ഓസ്ട്രേലിയ ആദ്യം ബാറ്റിങ് തിരഞ്ഞെടുക്കുകയായിരുന്നു. ടീമിൽ അപ്രതീക്ഷിത മാറ്റവുമായാണ് ഇന്ത്യ ഇറങ്ങിയത്. പരിക്കേറ്റ ആർ.അശ്വിനും രോഹിത് ശർമ്മയും ടീമിൽ ഉണ്ടാവില്ലെന്ന് നേരത്തെ പ്രഖ്യാപിച്ചിരുന്നു.

ടീം പ്രഖ്യാപിച്ചപ്പോൾ രോഹിതിന് പകരക്കാരനായി ഹനുമ വിഹാരിയെ ഉൾപ്പെടുത്തി. എന്നാൽ അശ്വിന് പകരം ഉമേഷ് യാദവിനെയാണ് ടീമിൽ ഉൾപ്പെടുത്തിയത്. ഒരു സ്പിന്നറെ പോലും ടീമിൽ ഉൾപ്പെടുത്തിയിട്ടില്ല. രവീന്ദ്ര ജഡേജയെയും പുറത്തിരുത്തി.