Ind vs Ban 2nd Test: കോലിക്കും പൂജാരക്കും അർധശതകം; ഒന്നാം ദിനം ഇന്ത്യ 174/3

കൊൽക്കത്ത: ഡേ നൈറ്റ് ടെസ്റ്റിൻെറ ഒന്നാം ദിനം കളി അവസാനിപ്പിക്കുമ്പോൾ ഇന്ത്യ മൂന്ന് വിക്കറ്റിന് 174 റൺസെടുത്തു. വിരാട് കോലിയും ചേതേശ്വർ പൂജാരയും അർധശതകങ്ങൾ നേടി. കളി നിർത്തുമ്പോൾ കോലി 59 റൺസുമായും ഉപനായകൻ അജിങ്ക്യ രഹാനെ 23 റൺസുമായും പുറത്താവാതെ നിൽക്കുന്നു. പൂജാര 55 റൺസെടുത്ത് പുറത്തായി. ഓപ്പണർമാരായ മായങ്ക് അഗർവാൾ (14), രോഹിത് ശർമ (21) എന്നിവരുടെ വിക്കറ്റുകളും ഇന്ത്യക്ക് നഷ്ടമായി. ഒന്നാം ദിനം ഇന്ത്യക്ക് 68 റൺസിൻെറ ലീഡാണുള്ളത്.


ബംഗ്ലാദേശ് ബാറ്റിങ് നിരയെ തകർത്ത് ഇന്ത്യൻ പേസ് പട

പിങ്ക് ബോളിൽ ബംഗ്ലാദേശ് ബാറ്റിങ് നിരയെ തകർത്ത് ഇന്ത്യൻ പേസർമാർ. രണ്ടാം ക്രിക്കറ്റ് ടെസ്റ്റിൻെറ ഒന്നാം ദിനം മത്സരം പകുതിയാവുമ്പോഴേക്കും ബംഗ്ലാദേശിൻെറ ഒന്നാം ഇന്നിങ്സ് അവസാനിച്ചു. 30.3 ഓവറിൽ വെറും 106 റൺസിനാണ് ബംഗ്ലാദേശ് ഓൾ ഔട്ടായത്. ഇശാന്ത് ശർമയാണ് അഞ്ച് വിക്കറ്റ് വീഴ്ത്തി ഇന്ത്യൻ ബോളർമാരിൽ കൂടുതൽ അപകടകാരിയായത്. ഉമേഷ് യാദവ് മൂന്ന് വിക്കറ്റും മുഹമ്മദ് ഷമി രണ്ട് വിക്കറ്റും വീഴ്ത്തി.


ഇന്ത്യൻ പേസർമാർക്ക് മുന്നിൽ ഒരിക്കൽ കൂടി തകർന്നടിഞ്ഞ് ബംഗ്ലാദേശ് ബാറ്റിങ് നിര. ലഞ്ചിന് പിരിയുമ്പോൾ 6 വിക്കറ്റ് നഷ്ടത്തിൽ ബംഗ്ലാദേശ് വെറും 73 റൺസാണ് എടുത്തത്.


ഇന്ത്യയും ബംഗ്ലാദേശും തമ്മിലുള്ള പിങ്ക് ബോൾ ടെസ്റ്റ് കൊൽക്കത്തയിൽ. രണ്ട് ടെസ്റ്റുകളുടം പരമ്പരയിൽ ഇന്ത്യ 1-0ന് മുന്നിലാണ്. രണ്ടാം ടെസ്റ്റും വിജയിച്ച് പരമ്പര തൂത്തുവാരാനാണ് ഇന്ത്യ ലക്ഷ്യമിടുന്നത്.

മത്സരത്തിൽ ടോസ് നേടിയ ബംഗ്ലാദേശ് ആദ്യം ബാറ്റ് ചെയ്യാൻ തീരുമാനിച്ചു. ഒന്നാം ടെസ്റ്റിൽ നിന്ന് മാറ്റങ്ങളൊന്നുമില്ലാത്ത ടീമുമായാണ് ഇന്ത്യ ഇറങ്ങിയിരിക്കുന്നത്. ആദ്യ ടെസ്റ്റിൽ ഇന്നിങ്സ് വിജയമായിരുന്നു ഇന്ത്യ നേടിയിരുന്നത്.