ബിനീഷ് കോടിയേരി കേരള ക്രിക്കറ്റ് അസോസിയേഷന്‍ അംഗം

തലശേരി: സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍റെ മകന്‍ ബിനീഷ് കോടിയേരി കേരള ക്രിക്കറ്റ് അസോസിയേഷന്‍ അംഗമായി തെരഞ്ഞെടുക്കപ്പെട്ടു. തലശേരി കോണോര്‍വയല്‍ ക്രിക്കറ്റ് സ്റ്റേഡിയത്തില്‍ തിങ്കളാഴ്ച നടന്ന ജില്ലാ ക്രിക്കറ്റ് അസോസിയേഷന്‍ എക്സിക്യുട്ടീവ് യോഗത്തിലാണ് ബിനീഷിനെ തെരഞ്ഞെടുത്തത്.

കണ്ണൂര്‍ ജില്ലാ ക്രിക്കറ്റ് അസോസിയേഷനെ പ്രതിനിധീകരിച്ചാണ് ബിനീഷ് കേരള ക്രിക്കറ്റ് അസോസിയേഷനില്‍ എത്തിയത്. കഴിഞ്ഞ വര്‍ഷം കണ്ണൂര്‍ ജില്ലാ ക്രിക്കറ്റ് അസോസിയേഷന്‍റെ കെസിഎയിലെ പ്രതിനിധികളായി പി.ബാബുരാജ്, ടി.കൃഷ്ണരാജു എന്നിവരെ തെരഞ്ഞെടുത്തിരുന്നു. ഇവരില്‍ ബാബുരാജ് കെസിഎ പ്രതിനിധി സ്ഥാനം ഒഴിഞ്ഞതോടെയാണ് ബിനീഷിന് നറുക്കുവീണത്.