ഊഹാപോഹങ്ങൾ പ്രചരിപ്പിക്കരുത്; പാണ്ഡ്യയുമായി ബന്ധമില്ലെന്ന് ഉർവശി

ഇന്ത്യൻ ക്രിക്കറ്റ് താരം ഹാർദിക് പാണ്ഡ്യയുമായി പ്രണയത്തിലാണെന്ന വാർത്തകൾ നിഷേധിച്ച് ബോളിവുഡ് നടി ഉർവശി റൗത്തേല. ഇത്തരത്തിലുള്ള പ്രചരണങ്ങൾ നിർത്തണമെന്ന് മാധ്യമങ്ങളോടും യൂ ട്യൂബ് ചാനലുകളോടും അഭ്യ‍ർഥിക്കുന്നതായി അവർ പറഞ്ഞു. തനിക്കൊരു കുടുംബമുണ്ടെന്ന് ഓർക്കണമെന്നും രക്ഷിതാക്കളോട് ഇത്തരം ഊഹോപോഹങ്ങളിൽ വിശദീകരണം നൽകേണ്ടി വരികയാണ് താന്നെന്നും അവ‍ർ പറഞ്ഞു. ഇൻസ്റ്റഗ്രാം സ്റ്റാറ്റസിലാണ് ഉർവശി ഇക്കാര്യങ്ങൾ വ്യക്തമാക്കിയത്.

ഒരു വീഡിയോയുടെ സ്ക്രീൻഷോട്ട് ഷെയ‍ർ ചെയ്ത് കൊണ്ടാണ് ഉർവശി ഇക്കാര്യം വിശദീകരിച്ചത്. ഉ‍ർവശിയും പാണ്ഡ്യയും തമ്മിൽ പ്രണയത്തിലാണെന്ന തരത്തിൽ ചില മാധ്യമങ്ങൾ ഗോസിപ്പ് വാ‍ർത്തകൾ നൽകിയിരുന്നു. യൂ ട്യൂബിലും മറ്റും വീഡിയോകളും പ്രചരിച്ചിരുന്നു. ഊഹാപോഹങ്ങളും പ്രചരണങ്ങളും ഏറെ വേദനിപ്പിക്കുന്നതാണെന്നും ഉ‍ർവശി പറഞ്ഞു.

ഇന്ത്യൻ ടീമിലെ യുവതാരങ്ങളിൽ ഒരാളായ ഹാ‍ർദിക് പാണ്ഡ്യയെയും ചില ബോളിവുഡ് നടിമാരെയും ചേർത്ത് നേരത്തെയും വാർത്തകൾ പുറത്ത് വന്നിരുന്നു. ഒരു പാർട്ടിയിൽ വെച്ച് ഉർവശി ഹാർദികിനെ പരിചയപ്പെട്ടുവെന്നും ഇരുവരും തമ്മിൽ ഡേറ്റിങിലാണെന്നുമായിരുന്നു വാർത്തകൾ. എന്നാലിപ്പോൾ ഇവയെല്ലാം ഉർവശി പൂർണമായും നിഷേധിച്ചിരിക്കുകയാണ്.