അഖിലേഷ് യാദവ് നാലാം വട്ടവും മാൻ ഓഫ് ദ മാച്ച്

ലക്‌നൗ: ഉത്തര്‍പ്രദേശില്‍ ഐ.എ.എസ് ഓഫീസേഴ്‌സും സി.എം ഇലവനും തമ്മില്‍ നടന്ന ടി20 സൗഹൃദ ക്രിക്കറ്റ് മത്സരത്തില്‍ സിഎം ഇലവന് നാലാംവട്ടവും വിജയം. ഞായറാഴ്ച ഐഎഎസ് വാരത്തോടനുബന്ധിച്ച് ലക്നൗവിൽ ലാ മർട്ടിനെയ്ർ ഗ്രൗണ്ടിൽ നടന്ന മത്സരത്തിലായിരുന്നു വിജയം. സിഎം ഇലവൻ ക്യാപ്റ്റനായ ഉത്തര്‍പ്രദേശ് മുഖ്യമന്ത്രി അഖിലേഷ് യാദവ് 11 ഫോറും ഒരു സിക്സുമടക്കം 65 റൺസ് നേടി ഇക്കുറിയും മാന്‍ ഓഫ്ദി മാച്ചായി.

ടോസ് നേടി ബാറ്റിങ് തെരഞ്ഞെടുത്ത സി.എം ഇലവന്‍ 20 ഓവറിൽ 127 റൺസാണ് നേടിയത്. ഐ.എ.എസ് ടീമിന് 126 റണ്‍െസടുക്കാനെ കഴിഞ്ഞുള്ളൂ. ചീഫ് സെക്രട്ടറി അലോക് രഞ്ജനായിരുന്നു ഐഎഎസ് ടീം ക്യാപ്റ്റൻ. ഉദ്യോഗസ്ഥരും രാഷ്ട്രീയക്കാരും ഒരുമിച്ച് നിന്നാല്‍ സംസ്ഥാനത്തെ പ്രശ്‌നങ്ങള്‍ അവസാനിപ്പിക്കാമെന്ന് അഖിലേഷ് മത്സര ശേഷം പറഞ്ഞു. ഇത്തരം മത്സരങ്ങളിലൂടെ പരസ്പരം മനസ്സിലാക്കാമെന്നും അദ്ദേഹം പറഞ്ഞു.