'ക്രിക്കറ്റ് വിദഗ്‍ദ‍ർ എവിടെപ്പോയി,' വെല്ലുവിളിച്ച് രവി ശാസ്ത്രി

ഡർബൻ: ദക്ഷിണാഫ്രിക്കക്കെതിരായ ടെസ്റ്റ് പരമ്പരയിൽ ഇന്ത്യൻ ടീമിനെതിരായ വിമർശനങ്ങൾക്ക് മറുപടിയുമായി പരിശീലകൻ രവി ശാസ്ത്രി. മികച്ച പ്രകടനവും ഫോമുമാണ് ഒരു താരത്തെ പ്ലേയിങ് ഇലവനിൽ ഉൾപ്പെടുത്തുന്നതിനുള്ള കാരണമെന്ന് അദ്ദേഹം പറഞ്ഞു.

ടെസ്റ്റിൽ മികച്ച ശരാശരിയോടെ കളിക്കുന്ന രോഹിത് ശർമ്മയെ മാറ്റി രഹാനെയെ കളിപ്പിക്കുക എന്നത് എന്ത് ന്യായമാണ്. അപ്പോൾ രോഹിതിൻെറ പ്രകടനത്തിന് വില കൽപ്പിച്ചില്ലെന്ന വിമർശനം വരില്ലേയെന്ന് അദ്ദേഹം ചോദിച്ചു. ഓരോ മത്സരത്തിലെയും സാഹചര്യം അനുസരിച്ചാണ് ടീമിൽ മാറ്റം വരുത്തിയതെന്നും ശാസ്ത്രി ടൈംസ് ഓഫ് ഇന്ത്യയോട് പറഞ്ഞു.

രോഹിത് റൺസ് കണ്ടെത്താൻ വിഷമിക്കുന്നത് മനസ്സിലാക്കിയാണ് മൂന്നാം ടെസ്റ്റിൽ രഹാനെയ കളിപ്പിച്ചത്. ബുംറയെ കളിപ്പിക്കണമെന്ന് നേരത്തെ തന്നെ തീരുമാനിച്ചതാണ്. രണ്ടാം മത്സരത്തിൽ ഭുവനേശ്വർ കുമാറിനെ കളിപ്പിക്കാതിരുന്നത് പിച്ചിൻെറ സാഹചര്യം പരിഗണിച്ചാണെന്നും ശാസ്ത്രി കൂട്ടിച്ചേർത്തു. ഇന്ത്യ നന്നായി കളിച്ച് തുടങ്ങിയപ്പോൾ ക്രിക്കറ്റ് വിദഗ്ദർ എവിടെ പോയെന്നും അദ്ദേഹം ചോദിച്ചു.