​ട്വൻറി20യിൽ മൂന്ന് സെഞ്ച്വറി നേടുന്ന ആദ്യതാരമായി മൺറോ

ന്യൂഡൽഹി: ട്വൻറി20 ക്രിക്കറ്റിൽ മൂന്ന് സെഞ്ച്വറി നേടുന്ന ലോകത്തെ ആദ്യ താരമായി ന്യൂസിലൻറ് ബാറ്റ്സ്മാൻ കോളിൻ മൺറോ. വിൻഡീസിനെതിരെ നടന്ന മൂന്നാം ട്വൻറി20 മത്സരത്തിലാണ് ഇടംകയ്യൻ ഓപ്പണറുടെ റെക്കോർഡ് പ്രകടനം.

53 പന്തിൽ നിന്ന് 10 സിക്സും 3 ഫോറും അടങ്ങിയതായിരുന്നു മൺറോ(104)യുടെ ഇന്നിങ്സ്. ഇന്ത്യക്കും ബംഗ്ലാദേശിനുമെതിരെയാണ് നേരത്തെ മൺറോ സെഞ്ച്വറികൾ നേടിയിട്ടുള്ളത്. ഇന്ത്യക്കെതിരെ നേടിയ 109 റൺസാണ് ട്വൻറി20യിൽ താരത്തിൻെറ ഏറ്റവും ഉയർന്ന സ്കോർ.

മൺറോയുടെ വെടിക്കെട്ട് സെഞ്ച്വറിയുടെ പിൻബലത്തിൽ ആദ്യം ബാറ്റ് ചെയ്ത കിവീസ് അഞ്ച് വിക്കറ്റ് നഷ്ടത്തിൽ 243 റൺസെടുത്തു. 244 റൺസ് വിജയലക്ഷ്യവുമായി ഇറങ്ങിയ വിൻഡീസ് 16.3 ഓവറിൽ 124 റൺസെടുക്കുന്നതിനിടെ ഓൾ ഔട്ടായി. 119 റൺസിന് കിവീസ് മത്സരം വിജയിച്ചു.