പരിശീലന മത്സരത്തിൽ ഷായ്ക്കും കോഹ‍്‍ലിക്കും അ‍ർധശതകം

സിഡ്നി: ഓസ്ട്രേലിയക്കെതിരായ ടെസ്റ്റ് പരമ്പരയ്ക്ക് മുന്നോടിയായുള്ള പരിശീലന മത്സരത്തിൽ തിളക്കമാർന്ന പ്രകടനവുമായി ഇന്ത്യൻ ബാറ്റ്സ്മാൻമാർ. ഇന്ത്യൻ ക്യാപ്റ്റൻ വിരാട് കോഹ‍്‍ലിയും പൃഥ്വി ഷായുമടക്കം അഞ്ച് ഇന്ത്യൻ ബാറ്റ്സ്മാൻമാരാണ് അർധശതകം നേടിയത്.

ക്രിക്കറ്റ് ഓസ്ട്രേലിയ ഇലവനെതിരായ മത്സരത്തിൽ ഇന്ത്യ 358 റൺസിന് എല്ലാവരും പുറത്തായി. ഇന്നത്തെ മത്സരം അവസാനിക്കുമ്പോൾ എതിർ ടീം വിക്കറ്റൊന്നും നഷ്ടപ്പെടാതെ 24 റൺസെടുത്തിട്ടുണ്ട്. ചേതേശ്വർ പൂജാര (54), അജിങ്ക്യ രഹാനെ (56), ഹനുമ വിഹാരി (53) എന്നിവരാണ് അർധ സെഞ്ച്വറി നേടിയ മറ്റ് താരങ്ങൾ.

66 റൺസ് നേടിയ ഷായാണ് ഇന്ത്യൻ നിരയിലെ ടോപ് സ്കോറർ. കോഹ‍്‍ലി 64 റൺസ് നേടി. വെറും മൂന്ന് റൺസെടുത്ത് പുറത്തായ കെ.എൽ.രാഹുൽ വീണ്ടും നിരാശപ്പെടുത്തി.