"കേരളം സുരക്ഷിതം, എല്ലാവരും വരൂ"; സ്നേഹത്തോടെ വിരാട് കോഹ്‍ലി

കേരളത്തെക്കുറിച്ച് നല്ല വാക്കുകള്‍ കുറിച്ച് ഇന്ത്യന്‍ ക്രിക്കറ്റ് ടീം ക്യാപ്റ്റന്‍ വിരാട് കോഹ്ലി. വെസ്റ്റ് ഇന്‍ഡീസിന് എതിരെയുള്ള ഏകദിന പരമ്പരയിലെ അവസാന മത്സരത്തിന് ഇന്ത്യന്‍ ടീം ഇപ്പോള്‍ കേരളത്തിലുണ്ട്. തിരുവനന്തപുരത്തെ കാര്യവട്ടം സ്റ്റേഡിയത്തിലാണ് മത്സരം.

ഇന്ത്യന്‍ ടീം തങ്ങുന്ന ഹോട്ടലിന്‍റെ സന്ദര്‍ശകര്‍ക്കുള്ള രജിസ്റ്ററിലാണ് വിരാട് കോഹ്‍ലി കേരളത്തെക്കുറിച്ച് എഴുതിയത്.

കോഹ്‍ലിയുടെ വാക്കുകള്‍ ഇങ്ങനെ,

"പരമമായ ആനന്ദമാണ് കേരളത്തില്‍ എത്തുന്നത്. കേരളത്തില്‍ വരുന്നതും കേരളത്തിന്‍റെ ഊര്‍ജ്ജം ഉള്‍ക്കൊള്ളുന്നതും എനിക്ക് പ്രിയപ്പെട്ടതാണ്. അനുഭവിച്ച് അറിയേണ്ടതാണ് കേരളത്തിന്‍റെ ഭംഗി. ദൈവത്തിന്‍റെ സ്വന്തം നാട്ടില്‍ എല്ലാവരും സന്ദര്‍ശിച്ച് ഈ ഊര്‍ജം എന്താണെന്ന് അനുഭവിക്കണം."

പ്രളയത്തിന് ശേഷം കേരളം തിരികെ സ്വാഭാവിക അവസ്ഥയിലേക്ക് എത്തിയതെന്നും കോഹ്‍ലി സൂചിപ്പിച്ചു.

"കേരളം തിരികെ സ്വന്തം കാലില്‍ നില്‍ക്കാന്‍ പ്രാപ്‍തയായിട്ടുണ്ട്. കേരളം പൂര്‍ണമായും സുരക്ഷിതമാണ്. ഈ മനോഹരമായ സ്ഥലത്തിന് നന്ദി, എല്ലായിപ്പോഴും ഞാന്‍ വരുമ്പോള്‍ എനിക്ക് സന്തോഷം നല്‍കുന്നതില്‍" വിരാട് എഴുതി.


വിരാട് ‍കോഹ്‍ലിയുടെ സന്ദേശം നിരവധി പേര്‍ ട്വീറ്റ് ചെയ്‍തു. കേരള ടൂറിസം മന്ത്രി കടകംപള്ളി സുരേന്ദ്രന്‍ കോഹ്‍ലിക്ക് നന്ദിയറിച്ചു. വെസ്റ്റ് ഇന്‍ഡീസിന് എതിരെയുള്ള മത്സരത്തില്‍ ഇന്ത്യന്‍ ടീമിന് വിജയവും നേര്‍ന്നു. തിരുവനന്തപുരത്തെ സ്റ്റേഡിയം ആദ്യമായാണ് ഒരു അന്താരാഷ്ട്ര ഏകദിന മത്സരത്തിന് വേദിയാകുന്നത്.