വാതുവെപ്പ്: കനേറിയക്കെതിരെ പുതിയ അന്വേഷണം നടത്താൻ പിസിബി

കറാച്ചി: ഇംഗ്ലീഷ് കൗണ്ടിയിൽ കളിക്കുമ്പോൾ വാതുവെപ്പ് നടത്തിയതായി കുറ്റസമ്മതം നടത്തിയ ഡാനിഷ് കനേറിയക്കെതിരെ പുതിയ അന്വേഷണം നടത്താൻ പാകിസ്ഥാൻ ക്രിക്കറ്റ് ബോർഡ്. വാതുവെപ്പ് ആരോപണവുമായി ബന്ധപ്പെട്ട് 2012ൽ ഇംഗ്ലണ്ട് ക്രിക്കറ്റ് ബോർഡ് കനേറിയയെ വിലക്കിയിരുന്നു.

എന്നാൽ താരം ഇത് നിഷേധിച്ചിരുന്നു. ആറ് വർഷത്തിന് ശേഷമാണ് കനേറിയ കുറ്റം സമ്മതിച്ചത്. തനിക്ക് തെറ്റു പറ്റിപ്പോയെന്നാണ് കനേറിയ ഇതേക്കുറിച്ച് പറഞ്ഞത്. എസെ‌ക്‌സിന് വേണ്ടി കൗണ്ടിയിൽ കളിക്കുമ്പോഴായിരുന്നു കനേറിയ വാതുവെപ്പ് കേസിൽ പെട്ടത്.

2009 സെപ്റ്റംബറില്‍ ഡര്‍ഹാമിനെതിരായ മത്സരത്തില്‍ എസെ‌ക്‌സ് സഹതാരം മെര്‍വിന്‍ വെസ്റ്റ്ഫീല്‍ഡിനൊപ്പം വാതുവയ്‌പുകാരില്‍ നിന്ന് പണം കൈപ്പറ്റി എന്നായിരുന്നു കേസ്.

കനേറിയയുടെ വെളിപ്പെടുത്തലുകൾ ഞെട്ടിപ്പിക്കുന്നതാണെന്ന് പാക് ക്രിക്കറ്റ് ബോർഡ് ചെയർമാൻ എഹ്സാൻ മാനി പറഞ്ഞു. താരത്തിനെതിരെ പുതിയ അന്വേഷണം നടത്തുമെന്നും അദ്ദേഹം വ്യക്തമാക്കി.