മുഹമ്മദ് കൈഫ് ഡൽഹി ഡെയർ ഡെവിൾസ് അസിസ്റ്റൻറ് കോച്ച്

ന്യൂഡൽഹി: മുൻ ഇന്ത്യൻ ക്രിക്കറ്റ് താരം മുഹമ്മദ് കൈഫിനെ വരുന്ന എെപിഎൽ സീസണിൽ ഡൽഹി ഡെയർ ഡെവിൾസ് അസിസ്റ്റൻറ് കോച്ചായി നിയമിച്ചു. ടീം മാനേജ്മെൻറ് തന്നെയാണ് ഇക്കാര്യം അറിയിച്ചത്. പരിശീലകനായി നേരത്തെ കഴിവ് തെളിയിച്ചിട്ടുള്ളയാണ് കൈഫ്.

2017 എെപിഎൽ സീസണിൽ ബ്രാഡ് ഹോഡ്ജിന് കീഴിൽ ഗുജറാത്ത് ലയൺസിൻെറ അസിസ്റ്റൻറ് കോച്ചായിരുന്നു അദ്ദേഹം. റിക്കി പോണ്ടിങും ജെയിംസ് ഹോപ്സും അടക്കമുള്ള ഡൽഹി കോച്ചിങ് സംഘത്തോടൊപ്പം ചേരാൻ ഒരുങ്ങുകയാണ് കൈഫ്.

ഡൽഹി ഡെയർ ഡെവിൾസിൻെറ ഭാഗമാവുന്നതിൽ സന്തോഷമുണ്ടെന്ന് കൈഫ് പ്രതികരിച്ചു. 37കാരനായ താരം ഈ വർഷം ആദ്യമാണ് ക്രിക്കറ്റിൽ നിന്ന് വിരമിക്കൽ പ്രഖ്യാപിച്ചത്. 125 ഏകദിനങ്ങളും 13 ടെസ്റ്റ് മത്സരങ്ങളും അദ്ദേഹം ഇന്ത്യക്കായി കളിച്ചിട്ടുണ്ട്.