മായങ്ക് അഗർവാൾ
ടെസ്റ്റ് ക്രിക്കറ്റിൽ തുടരുന്ന മികച്ച ഫോം മായങ്കിനെ ലിമിറ്റഡ് ഓവറിലും പരീക്ഷിക്കാമെന്നതിനുള്ള തെളിവാണ്. ടെസ്റ്റ് സ്പെഷ്യലിസ്റ്റ് ആയാണ് പരിഗണിക്കപ്പെടുന്നതെങ്കിലും മായങ്കിൻെറ ലിസ്റ്റ് എ റെക്കോർഡ് മികച്ചതാണ്. ദക്ഷിണാഫ്രിക്കക്ക് എതിരെയും ബംഗ്ലാദേശിനെതിരെയും അദ്ദേഹം ടെസ്റ്റിൽ ഡബിൾ സെഞ്ച്വറി നേടിയിരുന്നു. ഓപ്പണർ ശിഖർ ധവാൻ പലപ്പോഴും ടി20യിൽ പരാജയമാവുന്നുണ്ട്. ഓപ്പണറായി തന്നെ ഇന്ത്യക്ക് പരീക്ഷിക്കാവുന്ന ബാറ്റ്സ്മാനാണ് മായങ്ക് അഗർവാൾ.
ദിനേഷ് കാർത്തിക്
ഏകദിന ലോകകപ്പിന് ശേഷം ഇന്ത്യ ദിനേഷ് കാർത്തികിനെ ടീമിൽ പരിഗണിക്കുന്നില്ല. ദക്ഷിണാഫ്രിക്ക, ബംഗ്ലാദേശ് എന്നീ പരമ്പരകൾക്ക് പുറമെ വെസ്റ്റ് ഇൻഡീസിനെതിരെയും ഇന്ത്യ കാർത്തികിനെ ടീമിൽ എടുത്തില്ല. മഹേന്ദ്ര സിങ് ധോണിയുടെ അസാന്നിധ്യത്തിൽ ഇന്ത്യൻ ടീമിൽ ഫിനിഷറായി ഉപയോഗപ്പെടുത്താവുന്ന ബാറ്റ്സ്മാനാണ് കാർത്തിക്. പ്രാദേശിക ക്രിക്കറ്റിൽ താരം മികച്ച ഫോമിൽ കളിക്കുകയും ചെയ്യുന്നുണ്ട്.
രാഹുൽ ചാഹർ
വെസ്റ്റ് ഇൻഡീസിനെതിരായ പരമ്പരക്ക് ഇന്ത്യ സീനിയർ സ്പിന്നർമാരെ ടീമിലേക്ക് തിരികെ വിളിച്ചു. കുൽദീപ് യാദവും ചാഹലും ടീമിൽ ഇടം പിടിച്ചപ്പോൾ യുവതാരം രാഹുൽ ചാഹറിന് മുന്നിൽ വഴിയടഞ്ഞു. കഴിഞ്ഞ ഐപിഎൽ സീസണിൽ മുംബൈ ഇന്ത്യൻസിനായി കാഴ്ചവെച്ച മിന്നുന്ന പ്രകടനമാണ് ചീഹറിനെ ദേശീയ ടീമിലെത്തിച്ചത്. ടി20 ഫോർമാറ്റിൽ ഇന്ത്യക്ക് മുതൽക്കൂട്ടാവുന്ന സ്പിന്നറാണ് ഈ യുവതാരം.
കൃഷ്ണപ്പ ഗൗതം
വെസ്റ്റ് ഇൻഡീസ് പരമ്പരക്കുള്ള ടീം പ്രഖ്യാപനത്തിന് തൊട്ട് മുമ്പ് വരെ കൃഷ്ണപ്പ ഗൗതം പരിഗണിക്കപ്പെടുമെന്ന് റിപ്പോ‍ർട്ടുകളുണ്ടായിരുന്നു. കർണാടക ക്രിക്കറ്റിലെ പ്രതിഭാശാലിയായ യുവതാരങ്ങളിൽ ഒരാളാണ് ഗൗതം. കർണാടക പ്രീമിയർ ലീഗിൽ 56 പന്തിൽ നിന്ന് 134 റൺസ് നേടി താരം ഞെട്ടിച്ചിരുന്നു. ഓഫ് സ്പിന്നറായ ഗൗതം 4 ഓവറിൽ 15 റൺസ് വഴങ്ങി 8 വിക്കറ്റുകൾ പിഴുത് റെക്കോർഡ് പ്രകടനം കാഴ്ച വെക്കുകയും ചെയ്തിരുന്നു.
സഞ്ജു സാംസൺ
ഇന്ത്യയുടെ ടി20 ടീമിൽ പരിഗണിക്കപ്പെടാൻ എല്ലാ യോഗ്യതയുമുള്ള താരങ്ങളിൽ ഒരാളാണ് മലയാളി വിക്കറ്റ് കീപ്പ‍‍ർ ബാറ്റ്സ്മാൻ സഞ്ജു സാംസൺ. റിഷഭ് പന്തിനെ മാറ്റി ഒരു മത്സരത്തിലെങ്കിലും സഞ്ജുവിനെ പരീക്ഷിക്കാൻ ഇന്ത്യൻ സെലക്ട‍ർമാർ ഇപ്പോഴും തയ്യാറല്ല. വെസ്റ്റ് ഇൻഡീസിനെതിരായ പരമ്പരയിൽ സഞ്ജുവിനെ ഉൾപ്പെടുത്താത്തതിൽ ആരാധക‍ർ രൂക്ഷവിമ‍ർശനം ഉയർത്തിയിരുന്നു. രാജസ്ഥാൻ റോയൽസിന് വേണ്ടി ക്ലാസ് ബാറ്റിങ് പ്രകടനം കാഴ്ച വെക്കാറുള്ള ബാറ്റ്സ്മാനാണ് സഞ്ജു. വിജയ് ഹസാരെ ട്രോഫിയിൽ കേരളത്തിന് വേണ്ടിയുള്ള ഡബിൾ സെഞ്ച്വറി മറ്റൊരു ഉദാഹരണം മാത്രം.