കോലി ഇപ്പോഴും മികച്ച ക്യാപ്റ്റനായിട്ടില്ലെന്ന് ഗാവസ‍്‍കർ; 2019 ലോകകപ്പിൽ ഇന്ത്യക്ക് സംഭവിച്ചത് വൻ അബദ്ധം!!

ഐസിസി കിരീടങ്ങൾ നേടാതെ വിരാട് കോലിയെ മഹാനായ ക്യാപ്റ്റനായി വിലയിരുത്താൻ സാധിക്കില്ലെന്ന് സുനിൽ ഗാവസ്ക‍ർ പറഞ്ഞു. ഇന്ത്യാ ടുഡേയ്ക്ക് നൽകിയ അഭിമുഖത്തിലാണ് ഗാവസ്കറുടെ അഭിപ്രായ പ്രകടനം. "എൻെറ അഭിപ്രായത്തിൽ ഒരു ക്യാപ്റ്റൻ മികച്ച ക്യാപ്റ്റനാണെന്ന് പറയണമെങ്കിൽ ലോക കിരീടങ്ങളോ ലോക ചാമ്പ്യൻഷിപ്പുകളോ നേടിയിരിക്കണം," ഗാവസ്കർ പറഞ്ഞു. വരുന്ന മൂന്ന് വർഷത്തിനുള്ളിൽ മൂന്ന് ലോകകപ്പുകൾ വരുന്നുണ്ടെന്നും ഇനി അതായിരിക്കണം കോലിയുടെ ലക്ഷ്യമെന്നും ഗവാസ്കർ പറഞ്ഞു.

രോഹിത് ശർമയെ പോലെ ആക്രമണോത്സുകത കാണിക്കുന്ന ഒരു ബാറ്റ്സ്മാൻ തന്നെ എക്കാലത്തും കൊതിപ്പിക്കുന്നുണ്ടെന്നും ഗാവസ്കർ വെളിപ്പെടുത്തി. "ഇപ്പോൾ രോഹിത് കളിക്കുന്ന ശൈലിയിൽ കളിക്കാൻ ആഗ്രഹിച്ച ബാറ്റ്സ്മാനാണ് ഞാൻ. എന്നാൽ സാഹചര്യങ്ങളും ആത്മവിശ്വാസക്കുറവും അതിന് അനുവദിച്ചില്ല," ഗാവസ്കർ കൂട്ടിച്ചേർത്തു. ലോകത്ത് ടെസ്റ്റ് ക്രിക്കറ്റിൽ ആദ്യമായി 10000 റൺസ് തികച്ച ബാറ്റ്സ്മാനാണ് ഗാവസ്കർ.

Also Read: 8 ഫൈനലുകൾ കളിച്ച ഒരേയൊരു താരം; ഒരു സീസണിൽ 973 റൺസ്: ഐപിഎല്ലിൽ തകർക്കാനാവാത്ത 5 റെക്കോർഡുകൾ!

2019 ലോകകപ്പിൽ നാലാം നമ്പറിൽ ഒരു സ്പെഷ്യലിസ്റ്റ് ബാറ്റ്സ്മാൻ ഇല്ലാതെ പോയതാണ് ഇന്ത്യയുടെ തോൽവിക്ക് കാരണമായതെന്നും ഗാവസ്കർ പറഞ്ഞു. അങ്ങനെയല്ലായിരുന്നെങ്കിൽ ഫലം മറിച്ചായേനെയെന്നും അദ്ദേഹം കൂട്ടിച്ചേർത്തു. ഇന്ത്യയുടെ മധ്യനിരയ്ക്ക് പരിചയസമ്പത്ത് കുറവായിരുന്നു. ആദ്യഘട്ടത്തിൽ ടോപ് ഓർഡർ ബാറ്റ്സ്മാൻമാർ മികച്ച പ്രകടനം കാഴ്ച വെച്ചപ്പോൾ മധ്യനിരയ്ക്ക് വലിയ പരീക്ഷണം ഇല്ലായിരുന്നു. എന്നാൽ നോക്ക് ഔട്ട് ഘട്ടത്തിൽ ടോപ്പ് ഓർഡർ തകർന്നതോടെ പരിചയ സമ്പത്തില്ലാത്ത മധ്യനിരയ്ക്ക് ഒന്നും ചെയ്യാൻ സാധിച്ചില്ലെന്നും അദ്ദേഹം വിലയിരുത്തി.

Also Read: ഇന്ത്യയുടെ ക്രിക്കറ്റ് ലോകകപ്പ് ജേതാവ് തെരുവില്‍ പച്ചക്കറി വിറ്റ് ജീവിക്കുന്നു

വിരാട് കോലിയുടെ നേതൃത്വത്തിൽ നിലവിലുള്ള ടെസ്റ്റ് ടീം ഇന്ത്യയുടെ എക്കാലത്തെയും മികച്ച ടെസ്റ്റ് ടീമാണെന്നും ഗാവസ്കർ പറഞ്ഞു. ശക്തമായ ബൗളിങ് നിരയാണ് ഈ ടീമിനെ വ്യത്യസ്തമാക്കുന്നത്. ഏത് സാഹചര്യത്തിലും ഏത് എതിരാളിയെയും പരാജയപ്പെടുത്താൻ സാധിക്കുന്ന ടീമാണ് ഇന്ത്യക്കുള്ളത്. ഇപ്പോഴുള്ള ബാറ്റിങ് നിര 1980ൽ ഉള്ളതിന് സമാനമാണ്. എന്നാൽ അന്ന് ഇത് പോലൊരു ബൗളിങ് നിര ഇന്ത്യക്ക് ഉണ്ടായിരുന്നില്ലെന്നും ഗാവസ്ക‍ർ കൂട്ടിച്ചേർത്തു.