ഇന്ത്യൻ ടീം സെലക്ഷനിൽ തുറന്ന പോര്; ഗാംഗുലിയോട് വിയോജിച്ച് കാംബ്ലി

ന്യൂഡൽഹി: വെസ്റ്റ് ഇൻഡീസ് പര്യടനത്തിനുള്ള ഇന്ത്യൻ ടീമിനെ തെരഞ്ഞെടുത്തതിൽ വിയോജിപ്പുമായി മുൻ ഇന്ത്യൻ നായകൻ സൗരവ് ഗാംഗുലി രംഗത്തെത്തിയിരുന്നു. അജിങ്ക്യ രഹാനെയെ ഏകദിന ടീമിൽ ഉൾപ്പെടുത്താതതിലും ശുഭ്മാൻ ഗില്ലിനെ പരിഗണിക്കാത്തതിലും തനിക്ക് അത്ഭുതം തോന്നിയെന്ന് ഗാംഗുലി തുറന്നടിച്ചിരുന്നു. എല്ലാ ഫോർമാറ്റിലേക്കുമായി സെലക്ടർമാർ ചുരുക്കം താരങ്ങളെയും പരിഗണിച്ചിരുന്നുള്ളൂ. ഇക്കാര്യത്തിലും ഗാംഗുലി വിയോജിപ്പ് പ്രകടിപ്പിച്ചിരുന്നു.

എല്ലാ ഫോർമാറ്റിലും പരമാവധി ഒരേ താരങ്ങളെ പരിഗണിക്കണമെന്നാണ് മുൻ ഇന്ത്യൻ നായകൻെറ വാദം. "ടീമിൻെറ ഒത്തിണക്കത്തിനും ആത്മവിശ്വാസം ഉയർത്തുന്നതിനും എല്ലാ ഫോർമാറ്റിലും ഒരേ താരങ്ങളെ സെലക്ടർമാർ പരിഗണിച്ച് തുടങ്ങേണ്ട കാലമായിരിക്കുന്നു. വളരെ കുറച്ച് പേർ മാത്രമാണ് നിലവിൽ എല്ലാ ഫോർമാറ്റിലും കളിക്കുന്നത്. മികച്ച ടീമുകൾക്ക് സ്ഥിരതയാർന്ന കളിക്കാരുണ്ടാവും. എല്ലാവരെയും സന്തോഷിപ്പിക്കുക എന്നതല്ല ലക്ഷ്യമിടേണ്ടത്. മികച്ച താരങ്ങളെയാണ് രാജ്യത്തിന് വേണ്ടി പരിഗണിക്കേണ്ടത് ," ഗാംഗുലി പറഞ്ഞു.

എന്നാൽ ഇതിനോട് വിയോജിച്ച് രംഗത്തെത്തിയിരിക്കുകയാണ് മുൻ താരം വിനോദ് കാംബ്ലി. ഓരോ ഫോർമാറ്റിലും ഏറ്റവും മികച്ചവരെയാണ് പരിഗണിക്കേണ്ടതെന്ന് കാംബ്ലി പറഞ്ഞു. ഗാംഗുലിയുടെ ട്വീറ്റിന് മറുപടിയായാണ് കാംബ്ലി മറുപടി പറഞ്ഞിരിക്കുന്നത്.


"ഓരോന്നിനും അതിന് യോജിച്ചവരെയാണ് പരിഗണിക്കേണ്ടത്. മികച്ച താരങ്ങളെ അവർ ഏറ്റവും നന്നായി കളിക്കുന്ന ഫോർമാറ്റിൽ ഉപയോഗപ്പെടുത്തുക. താരങ്ങൾക്ക് മികച്ച അവസരം നൽകാനും വളർത്തിയെടുക്കാനും ഇത് ടീം ഇന്ത്യയെ സഹായിക്കും. പ്രധാന സീരീസുകളിൽ പിന്നീട് മികച്ച താരങ്ങളെ മാത്രം നമുക്ക് പരിഗണിക്കാനാവും. ഇംഗ്ലണ്ടും ഓസ്ട്രേലിയയും ഇതിന് മികച്ച ഉദാഹരണങ്ങളാണ്," കാംബ്ലി പറഞ്ഞു.

രോഹിത് ശർമ, വിരാട് കോഹ്ലി എന്നിവർക്ക് പുറമെ ഇന്ത്യ ചുരുക്കം ചില താരങ്ങളെ മാത്രമാണ് എല്ലാ ഫോർമാറ്റിലും എടുത്തിട്ടുള്ളത്. ചേതേശ്വർ പൂജാര, അജിങ്ക്യ രഹാനെ എന്നിവരെ ടെസ്റ്റിൽ മാത്രമാണ് ഉൾപ്പെടുത്തിയത്. രഹാനെയെ ഏകദിനത്തിലും ഉപയോഗിക്കണമെന്ന് ഗാംഗുലി ആവശ്യപ്പെടുന്നു. രോഹിതിനെ ടെസ്റ്റ് ടീമിൽ കളിപ്പിക്കണമെന്നും ഗാംഗുലി നേരത്തെ പല തവണ ആവശ്യപ്പെട്ടിരുന്നു.

ഏകദിന ലോകകപ്പിന് ശേഷം ഏതായാലും രോഹിതിനെ ടെസ്റ്റിൽ ടീമിൽ ഉൾപ്പെടുത്തിക്കഴിഞ്ഞു. ഏതായാലും മൂന്ന് ഫോർമാറ്റിലും ഒരേ താരങ്ങളെ കളിപ്പിക്കേണ്ടെന്നാണ് കാംബ്ലി പറയുന്നത്. ചേതേശ്വർ പൂജാരയെ പോലൊരു ക്ലാസിക് ബാറ്റ്സ്മാനെ ടി20യിൽ കളിപ്പിക്കുകയെന്നത് അത്ര എളുപ്പമുള്ള കാര്യമല്ല.

എല്ലാ ഫോർമാറ്റിലും കളിക്കാറുള്ള ചില ഫോർമാറ്റിൽ സ്പെഷ്യലിസ്റ്റ് ആയാ താരങ്ങൾ ഉണ്ടായിരുന്നെങ്കിലും അവരുടെ റോൾ വ്യത്യസ്തമായിരുന്നു. ആദം ഗിൽക്രിസ്റ്റ് ഏകദിനത്തിൽ ഓസ്ട്രേലിയയുടെ ഓപ്പണറായിരുന്നു. എന്നാൽ ടെസ്റ്റിൽ അദ്ദേഹത്തെ ആറാം നമ്പറിലും ഏഴാം നമ്പറിലും മറ്റുമാണ് കളിപ്പിച്ചിരുന്നത്.