ഇതാണ് ക്യാപ്റ്റൻ, ഇങ്ങനെയാവണം ക്യാപ്റ്റൻ; അജിങ്ക്യ രഹാനെക്ക് കയ്യടിച്ച് ക്രിക്കറ്റ് ലോകം!!

അഡലെയ്ഡിൽ ഒന്നാം ടെസ്റ്റിൽ ദയനീയ തോൽവിയേറ്റു വാങ്ങിയാണ് ഇന്ത്യ ബോക്സിങ് ഡേ ടെസ്റ്റിനിറങ്ങിയത്. നായകൻ വിരാട് കോലിയില്ല, പരിക്ക് കാരണം മുഹമ്മദ് ഷമിയില്ല. ഒന്നാം ടെസ്റ്റിൽ തരിപ്പണമായ ആത്മവിശ്വാസം കൈവിട്ട ബാറ്റിങ് നിരയും. എന്നാൽ ടീമിനെ മൊത്തത്തിൽ ഊർജസ്വലമായി നിലനിർത്തുന്ന കോലിക്ക് പകരക്കാരനായ നായകൻ അജിങ്ക്യ രഹാനെയാണ് കയ്യടി അർഹിക്കുന്നത്.

ഇന്ത്യയുടെ മുൻതാരങ്ങളായ വീരേന്ദർ സെവാഗിനും വിവിഎസ് ലക്ഷ്മണിനും ഓസീസ് സ്പിൻ ഇതിഹാസം ഷെയ്ൻ വോണിനുമൊന്നും ഇക്കാര്യത്തിൽ തർക്കമില്ല. ബോളർമാരായ ജസ്പ്രീത് ബുംറ, ആർ അശ്വിൻ, മുഹമ്മദ് സിറാജ് എന്നിവർ ഓസീസ് ബാറ്റ്സ്മാൻമാർക്ക് ചെറിയ തലവേദനയല്ല സൃഷ്ടിച്ചത്. കൃത്യമായ ഫീൽഡിങ് നിയന്ത്രണങ്ങങ്ങളിലൂടെയും ബോളിങ് മാറ്റങ്ങളിലൂടെയും രഹാനെ തൻെറ തന്ത്രങ്ങൾ നടപ്പാക്കി.



Also Read: അത് വിക്കറ്റല്ലാതെ പിന്നെന്താണ്? ടിം പെയ്നിനെ രക്ഷിച്ചത് അമ്പയറോ! ബോക്സിങ് ഡേ ടെസ്റ്റിൽ വൻ വിവാദം!!

ടോസ് നഷ്ടപ്പെട്ടപ്പോൾ ഇന്ത്യ പതറുമെന്ന് കരുതിയതാണ്. അഡലെയ്ഡ് ടെസ്റ്റിലെ ജയത്തിൻെറ ആത്മവിശ്വാസവും ഓസ്ട്രേലിയക്ക് ഉണ്ടായിരുന്നു. എന്നാൽ കാര്യങ്ങൾ ഇന്ത്യക്ക് അനുകൂലമാവുന്ന കാഴ്ചയാണ് കണ്ടത്.


വെറും 195 റൺസിന് ഓസീസിനെ ഇന്ത്യ പുറത്താക്കി. മുൻ മത്സരങ്ങളിൽ മോശമായ ഫീൽഡിങ് ഡിപ്പാർട്ട്മെൻറും മെച്ചപ്പെട്ടിട്ടുണ്ട്. രവീന്ദ്ര ജഡേജയുടെ വരവും ഇക്കാര്യത്തിൽ ഗുണം ചെയ്തു.