എെസിസിക്ക് ഇരട്ടനീതി: രൂക്ഷ വിമർശനവുമായി ഹർഭജൻ

ന്യൂഡൽഹി: പന്തിൽ കൃത്രിമം കാട്ടിയ സംഭവത്തിൽ ഓസീസ് താരങ്ങൾക്ക് നൽകിയ ശിക്ഷ പോരെന്ന് മുൻ ഇന്ത്യൻ താരം ഹർഭജൻ സിങ്. ഓസീസ് നായകൻ സ്റ്റീവ് സ്മിത്തിന് ഒരു ടെസ്റ്റിൽ വിലക്കും പന്ത് ചുരണ്ടിയ കാമറൂൺ ബാൻക്രോഫ്റ്റിന് മാച്ച് ഫീയുടെ 75 ശതമാനം പിഴയുമാണ് ശിക്ഷ വിധിച്ചിരിക്കുന്നത്.

എെസിസിക്ക് ഇക്കാര്യത്തിൽ ഇരട്ടനീതിയാണുള്ളത്. 2001ൽ ദക്ഷിണാഫ്രിക്കക്കെതിരായ ടെസ്റ്റിൽ വിവിധ കുറ്റങ്ങൾ ചുമത്തി ആറ് ഇന്ത്യൻ താരങ്ങളെ എെസിസി വിലക്കിയിരുന്നു. സൗരവ് ഗാംഗുലി, സച്ചിൻ ടെണ്ടുൽക്കർ, വീരേന്ദർ സെവാഗ്, ദീപദാസ് ഗുപ്ത, ശിവ സുന്ദർ ദാസ്, ഹർഭജൻ എന്നിവരെ ഒരു ടെസ്റ്റ് മത്സരത്തിലാണ് വിലക്കിയത്.

എന്നാൽ ഇന്ന് ബാൻക്രോഫ്റ്റിനെതിരെ എല്ലാ തെളിവുകളും പുറത്ത് വന്നിട്ടും വിലക്കേർപ്പെടുത്താൻ എെസിസി തയ്യാറാവാത്തത് എന്ത് കൊണ്ടാണെന്നും ഹർഭജൻ ചോദിച്ചു.