കോഹ‍‍്‍ലിയേക്കാൾ 34 പോയിൻറ് മുന്നിൽ; ടെസ്റ്റ് റാങ്കിങിൽ സിംഹാസനം ഉറപ്പിച്ച് സ്മിത്ത്

ന്യൂഡൽഹി: ടെസ്റ്റ് ക്രിക്കറ്റിലേക്ക് തിരികെയെത്തി ആദ്യ പരമ്പരയിൽ തന്നെ റാങ്കിങിൽ ഒന്നാം സ്ഥാനം തിരിച്ച് പിടിച്ചിരുന്നു മുൻ ഓസീസ് നായകൻ സ്റ്റീവ് സ്മിത്ത്. ഇപ്പോൾ ആഷസ് ടെസ്റ്റ് അവസാനിച്ചപ്പോൾ ഇന്ത്യൻ നായകൻ വിരാട് കോഹ‍‍്‍ലിയെ ബഹുദൂരം പിന്നിലാക്കിയിരിക്കുകയാണ് താരം.

ഏറ്റവും പുതിയ ടെസ്റ്റ് റാങ്കിങിൽ 937 പോയിൻറുമായാണ് സ്മിത്ത് ഒന്നാം സ്ഥാനം നിലനിർത്തിയത്. കോഹ‍‍്‍ലിക്ക് 903 പോയിൻറാണ് ഉള്ളത്. ബൗളർമാരിൽ ഓസീസ് പേസർ പാറ്റ് കമ്മിൻസ് തന്നെയാണ് ഒന്നാം സ്ഥാനത്ത്. 57 പോയിൻറ് പിന്നിൽ ദക്ഷിണാഫ്രിക്കയുടെ കഗിസോ റബാദയാണ് രണ്ടാം സ്ഥാനത്തുള്ളത്. ഇന്ത്യയുടെ ജസ്പ്രീത് ബുംറയാണ് മൂന്നാമത്.

Read More: ഇനിയും ക്ഷമ പരീക്ഷിക്കരുത്, ടീമിന് പുറത്താവും; യുവതാരത്തോട് രവി ശാസ്ത്രി

രണ്ട് ഓസ്ട്രേലിയൻ താരങ്ങൾ റാങ്കിങിൽ കാര്യമായി നേട്ടമുണ്ടാക്കിയിട്ടുണ്ട്. അഞ്ചാം ടെസ്റ്റിൽ സെഞ്ച്വറി നേടിയ മാത്യു വെയ്ഡ് 32 റാങ്കുകൾ മുന്നോട്ട് കയറി 78ാം സ്ഥാനത്തെത്തി. മിച്ചൽ മാർഷ് ബൗളർമാരുടെ പട്ടികയിൽ 54ാം റാങ്കിലെത്തി 20 സ്ഥാനങ്ങളാണ് അദ്ദേഹം മുന്നോട്ട് കയറിയത്.

ആഷസിൽ ഏറ്റവും മോശം പ്രകടനം കാഴ്ച വെച്ച താരങ്ങളിൽ ഒരാളായിരുന്നു ഓസ്ട്രേലിയൻ ഓപ്പണർ ഡേവിഡ് വാർണർ. ഏഴ് സ്ഥാനങ്ങൾ പിന്നോട്ട് പോയി അദ്ദേഹം 24ാം സ്ഥാനത്തെത്തി. ഇംഗ്ലണ്ട് പേസർ ജോഫ്ര ആർച്ചർ ടെസ്റ്റ് റാങ്കിങിൽ ആദ്യ 40ൽ ഇടം പിടിക്കുകയും ചെയ്തു.

Read More: ഇംഗ്ലണ്ടിന് 135 റൺസ് ജയം; പരമ്പര സമനിലയിൽ, ആഷസ് ഓസ്ട്രേലിയ നിലനിർത്തി