IND VS WI: റണ്‍വേട്ട കഴിഞ്ഞു; വിന്‍ഡീസിന് 378 റണ്‍സ് വിജയലക്ഷ്യം

മുംബൈ: വെസ്റ്റ് ഇന്‍ഡീസിനെതിരെ മുംബൈയില്‍ നടക്കുന്ന നാലാം ഏകദിനത്തില്‍ ഇന്ത്യയ്ക്ക് കൂറ്റന്‍ സ്കോര്‍. 50 ഓവറില്‍ 377 റണ്‍സാണ് ഇന്ത്യ അടിച്ചുകൂട്ടിയത്. 137 പന്തില്‍ നിന്നും ഹിറ്റ്മാന്‍ രോഹിത് ശര്‍മ്മ നേടിയ 162 റണ്‍സാണ് ഇന്ത്യയ്ക്ക് കൂറ്റന്‍ റണ്‍സ് സമ്മാനിച്ചത്. അമ്പാട്ടി റായിഡുവിന്‍റെ സെഞ്ചുറിയും റായിഡു- രോഹിത് കൂട്ടുകെട്ടില്‍ പിറന്ന 206 റണ്‍സും ഇന്ത്യയ്ക്ക് നിര്‍ണ്ണായകമായി.

ഏഴാമത് 150 പ്രകടനവുമായി രോഹിത് മടങ്ങിയപ്പോള്‍ 81 പന്തില്‍ 100 റണ്‍സാണ് അമ്പാട്ടി റായിഡു കൂട്ടിച്ചേര്‍ത്തത്. റായിഡുവിന്‍റെ കരിയറിലെ മൂന്നാം ഏകദിന സെഞ്ചുറിയാണിത്. ശിഖര്‍ധവാന്‍ 40 പന്തില്‍ 38 റണ്‍സും നായകന്‍ വിരാട് കോഹ്ലി 17 പന്തില്‍ 16 റണ്‍സുമെടുത്ത് പുറത്തായി. നാലാം ഏകദിനത്തില്‍ ടോസ് നേടിയ ഇന്ത്യ ബാറ്റിങ് തെരഞ്ഞെടുക്കുകയായിരുന്നു.