യോയോ ടെസ്റ്റിൽ പരാജയം: ഇന്ത്യ എ ടീമിൽ നിന്ന് സഞ‍്‍ജു പുറത്ത്

മുംബൈ: കായിക ക്ഷമതാ പരിശോധനയായ യോയോ ടെസ്റ്റിൽ പരാജയപ്പെട്ടതിനെ തുടർന്ന് മലയാളി ക്രിക്കറ്റ് താരം സഞ‍്‍ജു സാംസണിനെ ഇന്ത്യ എ ടീമിൽ നിന്ന് ഒഴിവാക്കി. ഇംഗ്ലണ്ട് പര്യടനത്തിൽ നിന്നുള്ള ടീമിൽ നിന്നാണ് താരത്തെ ബിസിസിഎെ ഒഴിവാക്കിയത്.

യോയോ ടെസ്റ്റിൽ സഞ‍്‍ജുവിന് എത്ര പോയൻറാണ് ലഭിച്ചത് എന്നതിനെ കുറിച്ച് കൃത്യമായ വിവരങ്ങൾ ലഭ്യമല്ല. ടെസ്റ്റ് പാസാവാൻ വേണ്ട 16.1 മാർക്ക് മറി കടക്കാൻ സഞ‍്‍ജുവിന് ആയില്ലെന്ന് മുംബൈ മിറർ റിപ്പോർട്ട് ചെയ്യുന്നു.

ശ്രേയസ് അയ്യർ നയിക്കുന്ന ഇന്ത്യ എ ടീമിൽ സഞ‍്‍ജുവിന് പകരമായി ആരെയും ഉൾപ്പെടുത്തിയിട്ടില്ല. താരത്തിൻെറ അസാന്നിധ്യം അപ്രതീക്ഷിതം ആയിരുന്നതിനാലാണ് സെലക്ടർമാർ മറ്റൊരാളെ ഉൾപ്പെടുത്താത്തത്.

ഇന്ത്യൻ പ്രീമിയർ ലീഗിൽ മികച്ച പ്രകടനം കാഴ്ച വെച്ച സഞ‍്‍ജു വലിയ പ്രതീക്ഷകളാണ് ഉയർത്തിയിരുന്നത്. എന്നാൽ യോയോ ടെസ്റ്റിലെ പരാജയം വലിയ തിരിച്ചടി ആയിരിക്കുകയാണ്.