​ഒരോവറില്‍ 3 വിക്കറ്റ്; ബേസിലിന്റെ മികവിൽ ഇന്ത്യ 'എ'

വിശാഖപട്ടണം: ഇന്ത്യ എ ടീമിന് മൂന്ന് വിക്കറ്റ് വിജയം. ന്യൂസീലന്‍ഡ് എയ്ക്കെതിരെയുള്ള പരമ്പരയിലെ അഞ്ചാം ഏകദിനത്തില്‍ മലയാളി താരം ബേസില്‍ തമ്പിയുടെ ബൗളിങ് മികവ് ഇന്ത്യയ്ക്ക് തുണയായി.
കിവീസ് മുന്നോട്ടുവെച്ച 174 റണ്‍സ് വിജയലക്ഷ്യം 32.1 ഓവറില്‍ ഏഴു വിക്കറ്റ് നഷ്ടത്തില്‍ ഇന്ത്യ മറികടക്കുകയായിരുന്നു. ചെറിയ സ്കോര്‍ പിന്തുടര്‍ന്ന ഇന്ത്യ തകര്‍ച്ചയോടെയാണ് തുടങ്ങിയത്. മുപ്പത് റണ്‍സെടുക്കുന്നതിനിടയില്‍ നാല് വിക്കറ്റ് നഷ്ടപ്പെട്ട ഇന്ത്യയെ പിന്നീട് അഭിമന്യു ഈശ്വറും ശ്രദ്ധുല്‍ ഠാക്കൂറും കരണ്‍ ശര്‍മ്മയും വിജയത്തിലേക്ക് നയിക്കുകയായിരുന്നു.

ആറോവര്‍ എറിഞ്ഞ ബേസില്‍ 19 റണ്‍സ് മാത്രം വഴങ്ങിയാണ് മൂന്നു വിക്കറ്റ് വീഴ്ത്തിയത്. രണ്ടു വിക്കറ്റ് വീതം വീഴ്ത്തിയ മുഹമ്മദ് സിറാജും ഷഹ്ബാസ് നദീമും മലയാളി താരത്തിന് മികച്ച പിന്തുണ നല്‍കി. മത്സരത്തിന്റെ 24-ാം ഓവറിലാണ് ബേസില്‍ മൂന്നു വിക്കറ്റുകളും സ്വന്തമാക്കിയത്.കിവീസിനായി ലോക്കി ഫെര്‍ഗൂസണ്‍ മൂന്നു വിക്കറ്റ് വീഴ്ത്തി. നേരത്തെ ടോസ് നേടി ബാറ്റിങ് തിരഞ്ഞെടുത്ത ന്യൂസീലന്‍ഡിന് ഇന്ത്യന്‍ ബൗളര്‍മാര്‍ക്ക് മുന്നില്‍ തകർന്നടിയുകയായിരുന്നു.

india a vs new zealand a 2017 match


new zealand a in india unofficial odi series.