അണ്ടർ 19 ലോകകപ്പിൽ ബംഗ്ലാദേശിനെ തോൽപ്പിച്ച് ഇന്ത്യ സെമിയിൽ

ന്യൂഡൽഹി: ബംഗ്ലാദേശിനെതിരെ ആധികാരിക വിജയവുമായി ഇന്ത്യ അണ്ടർ 19 ലോകകപ്പിൻെറ സെമിഫൈനലിൽ കടന്നു. വെള്ളിയാഴ്ച നടന്ന മത്സരത്തിൽ 131 റൺസിനാണ് ഇന്ത്യയുടെ വിജയം. ആദ്യം ബാറ്റ് ചെയ്ത ഇന്ത്യ 265 റൺസാണെടുത്തത്. മറുപടി ബാറ്റിങിൽ 134 റൺസിന് ബംഗ്ലാദേശ് ഓൾ ഔട്ടായി.

ഇന്ത്യക്കായി ശുഭ്‍മാൻ ഗിൽ (86), അഭിഷേക് ശ‍ർമ്മ (50) എന്നിവ‍ർ അർധശതകങ്ങൾ നേടി. 18 റൺസ് വഴങ്ങി ബംഗ്ലാദേശിൻെറ മൂന്ന് വിക്കറ്റ് വീഴ്ത്തിയ കമലേഷ് നാഗ‍ർകോട്ടിയാണ് ബൗളിങിൽ തിളങ്ങിയത്.

സെമിയിൽ പാകിസ്ഥാനായിരിക്കും ഇന്ത്യയുടെ എതിരാളികൾ. ദക്ഷിണാഫ്രിക്കയെ തോൽപ്പിച്ചാണ് പാകിസ്ഥാൻ സെമിയിലെത്തിയത്. മറ്റൊരു സെമിഫൈനലിൽ ഓസ്ട്രേലിയയും അഫ്ഗാനിസ്ഥാനും തമ്മിൽ ഏറ്റുമുട്ടും.