പത്തിന് ടീം ന്യൂസിലന്‍റിലേക്ക്
ഈ മാസം പത്തിനാണ് ശ്രീലങ്കയ്ക്ക് എതിരായ പരമ്പര അവസാനിക്കുന്നത്. ഇതിന് പിന്നാലെ ന്യൂസിലന്‍ഡ് പര്യടനത്തിനായി ഇന്ത്യന്‍ എ ടീം യാത്ര തിരിക്കുമെന്നാണ് റിപ്പോര്‍ട്ട്. ഈ മാസം 26നാണ് ന്യൂസിലന്‍റിനെതിരായ മത്സരം ആരംഭിക്കുന്നത്. മൂന്ന് മത്സരങ്ങള്‍ അടങ്ങിയതാണ് പരമ്പര. എന്നാല്‍ ഈ പരമ്പരയില്‍ ഇന്ത്യന്‍ നിരയില്‍ ചില താരങ്ങള്‍ ഉണ്ടായേക്കില്ലെന്ന സൂചനകളാണ് പുറത്ത് വരുന്നത്.
പൃത്വി ഷായ്ക്ക് കളിക്കാനായേക്കില്ല
ഈ അടുത്ത കാലത്താണ് യുവതാരം പൃഥ്വി ഷാ ക്രിക്കറ്റിലേക്ക് തിരിച്ചെത്തിയത്. സജീവ ക്രിക്കറ്റിലേക്ക് തിരിച്ചെത്തിയതിന് പിന്നാലെ താരം സയ്യിദ് മുഷ്താഖ് അലി ടി20യില്‍ കളിച്ചിരുന്നു. ടൂര്‍ണമെന്റിലെ തകര്‍പ്പന്‍ പ്രകടനത്തെ തുടര്‍ന്ന് ന്യൂസിലന്‍ഡ് പര്യടനത്തിനുള്ള ഇന്ത്യന്‍ എ ടീമിലേക്ക് ക്ഷണം ലഭിക്കുകയും ചെയ്തു. എന്നാലിപ്പോള്‍ വീണ്ടും തിരിച്ചടി നേരിടുകയാണ് താരം.
ആദ്യം ഉത്തേജക പരിശോധനയില്‍ കുടുങ്ങി
ഉത്തേജക പരിശോധനയില്‍ പരാജയപ്പെട്ടതിന് പിന്നാലെ ജൂലൈ 30നാണ് പ്രിത്വി ഷാ, അക്ഷയ്, ദിവ്യ ഗജരാജ് എന്നീ താരങ്ങള്‍ക്ക് ബിസിസിഐ വിലക്ക് ഏര്‍പ്പെടുത്തുന്നത്. ആറ് മാസത്തേക്കാണ് താരത്തെ വിലക്കിയത്. എന്നാല്‍ വാഡ വിലക്ക് നീക്കിയതോടെയാണ് താരം വീണ്ടും ഇന്ത്യന്‍ ടീമിലെത്തിയത്. പക്ഷേ നിര്‍ഭാഗ്യം താരത്തെ വീണ്ടും വേട്ടയാടുകയാണ്.
പരിക്ക് തിരിച്ചടിയായേക്കും
രഞ്ജി ട്രോഫിയില്‍ കര്‍ണാടകയ്‌ക്കെതിരായ മത്സരത്തിനിടെ ഏല്‍ക്കേണ്ടി വന്ന പരിക്കാണ് പൃത്വി ഷായ്ക്ക് വീണ്ടും തിരിച്ചടിയായിരിക്കുന്നത്. ഇതോടെ താരത്തിന് ന്യൂസിലന്‍ഡ് പര്യടനം നഷ്ടമായേക്കുമെന്നാണ് സൂചന. മുംബൈയുടെ താരമായ പൃത്വിക്ക് കര്‍ണാടകയ്‌ക്കെതിരായ മത്സരത്തില്‍ ഓവര്‍ത്രോ സേവ് ചെയ്യുന്നതിനിടെയാണ് തോളിന് പരിക്കേറ്റത്. പിന്നാലെ കളം വിട്ട താരം എംആര്‍ഐ സ്‌കാനിങ്ങിന് വിധേയനാവുകയും തുടര്‍ന്ന് കൂടുതല്‍ പരിശോധനയ്ക്കായി നാഷണല്‍ ക്രിക്കറ്റ് അക്കാദമിയിലേക്ക് പോവുകയായിരുന്നു. നിലവിലെ സാഹചര്യത്തില്‍ താരത്തിന് ന്യൂസിലന്‍ഡ് പര്യടനം നഷ്ടമായേക്കും.