ഇടവേളയ്ക്ക് ശേഷം ബദ്ധവൈരികള്‍ നേര്‍ക്കുനേര്‍

ദുബായ്: അന്താരാഷ്ട്ര ക്രിക്കറ്റിലെ ബദ്ധവൈരികളായ ഇന്ത്യയും പാകിസ്ഥാനും ഒരിടവേളയ്ക്ക് ശേഷം വീണ്ടും നേര്‍ക്കുനേര്‍ പോരിനിറങ്ങുന്നു. ഏഷ്യാ കപ്പിലെ തങ്ങളുടെ രണ്ടാം മത്സരത്തിലാണ് ഇന്ത്യ പാകിസ്ഥാനെതിരെ ഇറങ്ങുന്നത്. ദുബായില്‍ നടക്കുന്ന മത്സരം വൈകീട്ട് അഞ്ച് മണിക്കാണ് ആരംഭിക്കുക. പതിനഞ്ച് മാസങ്ങള്‍ക്ക് ശേഷമാണ് ഇന്ത്യയും പാകിസ്ഥാനും തമ്മില്‍ നേര്‍ക്കുനേര്‍ കൊമ്പുകോര്‍ക്കുന്നത്.

2017 ജൂണ്‍ 18നാണ് അവസാനമായി ഇന്ത്യ പാകിസ്ഥാനെതിരെ കളിച്ചത്. ഐസിസി ചാമ്പ്യന്‍സ് ട്രോഫിയിലെ ഈ മത്സരത്തില്‍ 180 റണ്‍സിന് ഇന്ത്യയെ പരാജയപ്പെടുത്തിയിരുന്നു. ഇതിന് പകരം വീട്ടാന്‍ കൂടിയാകും ഇന്ത്യ നാളെ ഇറങ്ങുക. വിരാട് കോഹ്‍ലിയുടെ അഭാവത്തില്‍ രോഹിത് ശര്‍മ്മയാണ് ഏഷ്യാ കപ്പില്‍ ടീമിനെ നയിക്കുന്നത്.